Jamol Nosirov Buxoro viloyati Ekologiya, atrof muhitni muhofaza qilish va iqlim oʻzgarishi boshqarmasi boshligʻi etib tayinlandi. Bu haqda viloyat hokimligi matbuot xizmati xabar berdi.

Maʼlumot oʻrnida, Jamol Nosirov 1985-yil 12-iyunda Buxoro shahrida tavallud topgan. 2005-yili Buxoro davlat universitetining jismoniy madaniyat va jismoniy tarbiya oʻqituvchisi, psixolog mutaxassisligi boʻyicha tamomlagan. 2008-yili esa universitetning magistraturasini tugatgan.

Bir muddat “Kamolot” YOIH Buxoro viloyat Kengashi raisi lavozimida ham mehnat qilgan.

Shundan soʻng 27-Jilvon saylov okrugidan Oliy Majlis Qonunchilik palatasiga deputat etib saylangan edi. Tadbirkorlar va ishbilarmonlar harakati – Oʻzbekiston Liberal-Demokratik partiyasining fraksiyasi aʼzosi boʻlgan.

2017-yildan 2020-yilga qadar Buxoro viloyati hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari lavozimida faoliyat yuritgan.

Jamol Nosirov 2020-yildan 2021-yilga qadar Madaniyat vazirining birinchi oʻrinbosari lavozimida faoliyat olib borgan hamda oʻsha yilning 5-may kuni Buxoro shahar hokimligida boʻlib oʻtgan navbatdan tashqari sessiya yigʻilishida shahar hokimi lavozimiga tayinlangan.

U shaharga uch yil hokimlik qilganidan soʻng joriy yilning may oyida sogʻligʻi yomonlashgani sabab oʻz arizasi bilan lavozimidan ozod qilingan.