Oʻzbekiston Respublikasi Prezidenti Shavkat Mirziyoyevning “Uzbekistan GTL” zavodining ochilishiga tashrifi davomida “Oʻzbekneftgaz” AJ Boshqaruvi raisi Mehriddin Abdullayevga bergan topshiriqlari ijrosini taʼminlash maqsadida bir qator istiqboli maydonlarda neft va gaz geologiya-qidiruv ishlari jadal surʼatlarda olib borilmoqda.

Boshqaruv raisi boshchiligida mutaxassislar tomonidan amalga oshirilayotgan geologiya-qidiruv ishlari natijasida Buxoro viloyatining Qorakoʻl tumani hududida “Yangi Alat” - yangi gazkondensat koni ochishga muvaffaq boʻlindi.

2022-yilning 31-may kuni “Oʻzbekneftgaz” AJ tomonidan “Yangi Alat” konidagi 1-sonli izlov qudugʻida burgʻilash ishlari boshlanib, quduq 2344 metr chuqurlikgacha burgʻilab tugatildi.

Joriy yilning 19-avgust kuni “Yangi Alat” koniga qarashli 1-sonli quduqning 2342-2283 metr oraligʻida filtr orqali sinash ishlari oʻtkazilib, yura davri yotqiziqlarining XV mahsuldor qatlamidan sanoat miqyosidagi tabiiy gaz va gaz kondensat mahsulotlari olindi va yangi gazkondensat koni ochildi.

Tadqiqotlar quduqdan kunlik 800 ming kub metr tabiiy gaz va 15 tonnadan ortiq gazkondensati mahsuloti chiqayotganligini tasdiqladi.

Taʼkidlash joizki, “Yangi Alat” koni 2021-yilda “Oʻzbekneftgaz” AJ mutaxassislari tomonidan 3D seysmik maʼlumotlarni qayta ishlash natijasida aniqlanib, unga koʻra, yangi quduqni burgʻilash uchun Davlat geologiya qoʻmitasi tomonidan maydonning pasport maʼlumotlari tayyorlangan.

Konning istiqbolli maydoni 7,5 kv.km., S3 toifali resurslari 2,2 mlrd kub metrda ortiq tabiiy gaz hamda 70 ming tonna gaz kondensatini tashkil qiladi. Ushbu kon “Gʻarbiy Tegirmon” va “Tegirmon” konlari atrofida joylashgan.

Hozirda “Yangi Alat” konining 1-sonli qudugʻida mahsuldor qatlamning bosimi, harorati va boshqa kon-geologik parametrlarini aniqlash hamda uning sanoat miqyosida ishlab chiqarish quvvatlarini baholash maqsadida, geologik-tadqiqot ishlari olib borilmoqda.

Yil yakuniga qadar, yangi konda “Oʻzbekneftgaz” AJ boʻyicha 2022-yilga moʻljallangan uglevodorod xom ashyo bazasini rivojlantirish va qayta hosil qilish dasturi doirasida navbatdagi 2-3 izlov qudugʻini burgʻilash ishlarini olib borish rejalashtirilgan.