Isteʼdodli shoir, adib va tarjimon Muhammad Ali (Muhammad Ali Ahmedov) 1942-yil 1-martda Andijon viloyatida tugʻilgan.

Ijodkor “Fazodagi hislar”, “Shafaq”, “Otalar yurti”, “Dostonlar”, “Oq nur”, “Ilhom parisi”, “Sen bir gulsan”, “Ona duosi” va boshqa sheʼriy asarlari, “Boqiy dunyo”, “Ulugʻ saltanat”, “Sarbadorlar” kabi nazmiy va nasriy romanlari bilan milliy adabiyotimizni boyitdi. Adibning oʻnlab tarjimalari kitobxonlar qoʻliga yetib borgan.

Oʻzbekiston madhi

Oʻzbekiston – sen buyuk doston,

Shoir yozdi qalb qoni bilan.

Tugʻyon, armon, tepib turgan jon,

Vijdoniyu imoni bilan!

Ayamasdan yoshligin zinhor,

Orzularin barin etib jam,

Shijoatu shiddat, neki bor

Fido qildi senga chinakam!

Farzand burchi – zalvorli yukdir,

Mayishguvsi anov-manov qad!

Qoshingdaku qarzi buyukdir,

Bittasini uzoldi faqat:

Ona-Vatan peshonasida

Balqib yondi tole yulduzi!

Farzand uchun, doʻstlar, aslida

Bundan ortiq ne baxt bor oʻzi?..

Ona Vatan! Mangu omon boʻl!

Sen jismlar ichida jon boʻl!

Umri boqiy buyuk doston boʻl!

Oʻzbekiston, Oʻzbekiston boʻl!..

Oh, jonajon Vatan

Oh, jonajon Vatan! Timsoling

Sobit turar qalbim qatida.

Chechak yozgay yorqin iqboling

Farzandingning muhabbatida!

Yurtim bordir, demangiz, nechuk?

Yurtsiz dillar dogʻdir, kuyukdir.

Inson uchun, kattami, kichik

Tuqqan yurti doim buyukdir.

Maqtanayin, koʻrsin keng jahon,

“Vatan!” debon koʻksim kerayin!

Doston bitay, bir ajib doston.

Taqdiringni soʻylab berayin.

Dostonimning har bitta faslin

Noming bilan boshlayin, diyor!

Sevsam diyorlarning asilin,

Mendan baxtli dunyoda kim bor?..

Sen uvalik-juvalik yurtsan,

Toshkent, Qoʻqon, Xivalik yurtsan,

Nasibang bor ming-ming yillarda,

Hali yaralmagan dillarda!…

(“Boqiy dunyo” sheʼriy romanidan parchalar)