Bolalar milliy tibbiyot markazi — mamlakatimizning eng ilgʻor tibbiyot muassasalaridan biri.

2023-yilning oʻtgan davrida kichik yoshli bemorlarda ilk bor umurtqa pogʻonasi qiyshiqligi (skolioz) kasalligini radikal korreksiyasi amaliyoti yoʻlga qoʻyilib, hozirgacha 30 ga yaqin bolada ushbu operatsiya muvaffaqiyatli oʻtkazildi.

Vaholanki, bugunga qadar mazkur amaliyotlar Turkiya va Hindiston davlatlarida 20-25 ming AQSH dollari evaziga amalga oshirilib kelingan.

Shuningdek, joriy yil markazda birinchi marta bolalarda buyrak koʻchirib oʻtkazish operatsiyasi mahalliy mutaxassislar ishtirokida bajarildi.

Qolaversa, shu yil iyul oyida Oʻzbekistonda ilk bor oqqon kasalligiga chalingan bolalarda suyak koʻmigi autotransplantatsiyasi amaliyoti Hindiston va Belarus davlatlaridan kelgan mutaxassislar bilan hamkorlikda muvaffaqiyatli oʻtkazildi.

Mazkur muolaja Turkiya va Belarus davlatlarida 120-170 ming AQSH dollari evaziga qilinishini inobatga olsak, ushbu amaliyotning yoʻlga qoʻyilishi mamlakatimiz tibbiyotida erishilgan katta yutuqlardan biri boʻldi.

Hozirgi kunda suyak koʻmigi autotransplantatsiyasi amaliyotini yiliga 70 tagacha yetkazish boʻyicha tegishli chora-tadbirlar koʻrilmoqda.

Bundan tashqari, joriy yil Oʻzbekiston tarixida ilk bor Nukus shahrida bir kunlik chaqaloqda markaz mutaxassislari ishtirokida tugʻma nuqson hisoblangan Ekstrafiya va Epispadiya kompleks kasalligi jarrohlik yoʻli bilan davolandi.