“Bino va inshootlarning zilzilabardoshligini oshirishga oid qoʻshimcha chora-tadbirlar toʻgʻrisida”gi Hukumat qarori (727-son, 17.11.2025-y.) qabul qilindi. Bu haqida “Huquqiy axborot” Telegram-kanali xabar berdi.

Mazkur qarorga koʻra, 2025-yil 1-dekabrdan zilzilalar kuchini koʻrsatib beruvchi mintaqaviy akselerogrammalar bazalaridan kelib chiqib loyihalashtirish amaliyoti yoʻlga qoʻyiladi.

2027-yil 1-oktyabrga qadar MSK-64 shkalasi boʻyicha 8 va undan yuqori balli seysmik faol zonalarda maxsus seysmik himoyalash uskunalari yordamida loyihalashtirishga ustuvorlik beriladigan obyektlar turlari tasdiqlanadi.

2026-yil 1-fevraldan:

• Vazirlar Mahkamasining 2022-yil 15-oktyabrdagi 603-son qarori asosida beriladigan zilzilabardoshlik boʻyicha ilmiy xulosa uchun undiriladigan toʻlov miqdori 50 foizga qisqartiriladi;
• bir xil seriyali obyektlarga ilmiy xulosalar faqat 1 marotaba toʻlov asosida beriladi, qolgan shu turdagi obyektlarning loyihalariga ilmiy xulosa berish uchun toʻlov undirilmaydi.

Shuningdek, zilzilabardoshlik boʻyicha ilmiy xulosalar berish “Shaffof qurilish” milliy axborot tizimiga integratsiya qilinadi.