Foto: Xalq so‘zi

Fargʻona viloyati Bagʻdod tumani markazida bahor elchisi – sumalak sotilmoqda. Bu hozirgi sovuq kunlarda koʻklam sogʻinchi bilan yashayotgan tuman ahli uchun oʻziga xos tuhfa boʻldi.

— Nasib qilsa, “ilik uzildi” kunlar ham yaqinlashmoqda, —deydi Bagʻdod tumani “Doʻstlik” MFYda istiqomat qiluvchi Donoxon aya Sultonova. — Shunday paytda organizm kuchsizlanib, tabiiy darmondorilarga kuchli ehtiyoj sezadi. Ayniqsa, bu yilgi ayozli kunlar hammamizni sinovdan oʻtkazdi. Ayni paytda farzandlarim bilan, oilaviy anʼanamizga koʻra, sumalak tayyorlab, el dasturxoniga yetkazishdek savobli ishni boshlab yubordik. Endi Navroʻz bayramigacha shu yumush bilan band boʻlamiz.

— Qariyb 15 yildan buyon onam qish chillasida uyda sumalak tayyorlab, bozorga olib chiqadi, — deydi onaxonning oʻgʻli Muzaffar Matkarimov. — Onam tayyorlaydigan sumalakning darmondoriligi va oʻziga xos mazasi butun tumanimizda mashhur. Shu bois bu sumalakning xaridorlari koʻp.

Aytish kerakki, bu oila aʼzolari har kuni bir qozon sumalak tayyorlab, bozorga chiqarmoqda. Mahsulot bir martalik idishlarga joylangan holda mijozlarga taklif etilyapti. Sumalakning yarim litri 15 ming, bir litri 30 ming soʻm.

Botir Madiyorov, “Xalq soʻzi”.