Yangi yil bayrami hech bir xonadonda dasturxon bezatishsiz oʻtmaydi. Shu bois ham bayram arafasida bozorlarimizda oziq-ovqat mahsulotlariga boʻlgan talab odatdagidan bir necha bor ortishi tayin.

Shu bois ham mamlakatimizda bayramlar oldidan asosiy turdagi oziq-ovqat mahsulotlarining savdo yarmarkalarini tashkil etish anʼanaga aylangan.

Qarshi shahridagi “Yerqoʻrgʻon” dehqon (oziq-ovqat) bozorida ham arzonlashtirilgan savdo yarmarkasi uchun zarur rastalar ajratilib, bu yerda hududdagi fermer va dehqon xoʻjaliklari oʻzlari yetishtirgan mahsulotlarni keltirib sotishi uchun barcha shart-sharoitlar yaratilgan.

- Reja asosida 2 ming tonnaga yaqin qishloq xoʻjaligi mahsulotlari zaxira qilingan, — deydi bozor raisi Toshturdi Toʻrayev. — Omborlarimizda kartoshka, piyoz, sabzi, guruch kabi asosiy mahsulotlar mavjud. Yangi yil bayrami arafasida aholini arzon va sifatli mahsulotlar bilan taʼminlash maqsadida bayram yarmarkalarini tashkil etdik.

Ayni paytda Qashqadaryo viloyatidagi barcha dehqon (oziq-ovqat) bozorlari hamda yirik savdo markazlarida ham arzonlashtirilgan qishloq xoʻjaligi mahsulotlari yarmarkalari tashkil qilinib, ularda goʻsht, tuxum, yogʻ, poliz, sabzavot mahsulotlari va boshqa sarxil meva-chevalar sotilyapti.

Jahongir BOYMURODOV, “Xalq soʻzi”.