Foto: bgvoice.com

Amerika Qoʻshma Shtatlar Isroil bilan qiymati 20 milliard AQSH dollardan ortiq boʻlgan muhim qurol yetkazib berish bitimini maʼqulladi. Bu haqda “Newsweek” nashri xabar berdi.

Maʼlum boʻlishicha, shartnoma Isroilning mudofaa qobiliyatini oshirish uchun “F-15” qiruvchi samolyotlari va tank oʻq-dorilari kabi ilgʻor qurollarni yetkazib berishni oʻz ichiga oladi. AQSH Davlat kotibi Entoni Blinken ushbu loyihani maʼqullagan.

Qurollarni yetkazib berish bir necha yil davom etishi kutilmoqda. Birinchi paket 2029-yilga qadar amalga oshiriladi. Shartnoma shuningdek, Isroilning “F-15” samolyotlari parki uchun maxsus toʻplamlarni ham oʻz ichiga oladi.

Qaror Isroil va XAMAS oʻrtasida davom etayotgan mojaro fonida qabul qilingani mojaroning davomiyligini oshirib yuborishi mumkin. Isroilning tinimsiz hujumlari ortidan Gʻazoda 10 mingdan ortiq tinch aholi qurbon boʻlgan boʻlib, ushbu talafotlar kasalxonalardan tortib, tinch aholi uylarigacha yetib borgan.

Yaqinda Bayden maʼmuriyati Isroil tomonidan Gʻazoning aholi gavjum hududlariga havo hujumlari uyushtirilishidan xavotirlanib, baʼzi bombalarni Isroilga yetkazib berishni kechiktirgandi. AQSH muzokaralar boshlash kerakligini qayta-qayta aytayotgan boʻlsa-da, jang uchun qurollarni yetkazib berishdan tiyilmayapti.

Avvalroq, Donald Tramp Venesuelaga qochib ketmoqchiligi haqida xabar berilgandi.