Illyustrativ foto

AQSH Kongressining Vakillar palatasi Ukraina xavfsizligiga koʻmaklashish tashabbusi (Ukraine Security Assistance Initiative, USAI) doirasida qurol ishlab chiqarish uchun 400 million dollar ajratdi. Bu haqda “The New York Times” nashri xabar berdi.

231 kongressmen qonun loyihasini yoqlab, 196 nafari qarshi ovoz berdi.

USAI dasturi mudofaa korxonalaridan harbiy texnika ishlab chiqarish va sotib olishni moliyalashtirishni nazarda tutadi. Keyinchalik qurollar Ukrainaga topshirilishi mumkin. Biroq ishlab chiqarilgan qurollarni respublikaga yetkazib berish oʻz-oʻzidan amalga oshirilmaydi, faqat Mudofaa vazirining taqdimnomasi bilan amalga oshiriladi. Yaʼni, AQSH bu qurollarni saqlab qolishi mumkin.

Shu yilning 9-sentyabr kuni AQSH Kongressi Vakillar palatasi aʼzosi Marjori Teylor Grin Ukrainaga harbiy yordamni qisqartirishni taklif qilgandi. Uning hisob-kitoblariga koʻra, amerikalik soliq toʻlovchilar allaqachon Ukrainani qoʻllab-quvvatlash uchun 175 milliard dollardan koʻproq mablagʻ sarflagan va bu yetarli hamda AQSH endi chet el urushlarini moliyalashtira olmaydi.