Arxiv foto

Amerika Qoʻshma Shtatlari Gruziya hukumati aʼzolari, qonun chiqaruvchilar va huquq-tartibot idoralari xodimlariga nisbatan viza cheklovlarini joriy qildi. Bu haqda AQSH Davlat departamenti xabar berdi.

Amerika departamentining tushuntirishicha, bunday choralar “Gruziyada demokratiyani buzishda masʼul boʻlgan yoki unga aloqador boʻlganlarga” nisbatan qoʻllanilgan. Hammasi boʻlib 20 nafar Gruziya fuqarosiga nisbatan sanksiyalar qoʻllanilgan. Davlat departamenti Vashington namoyishchilar, huquq faollari, muxolifatchilar va jurnalistlarga nisbatan zoʻravonlik harakatlarini qoralashini taʼkidladi.

Avvalroq, AQSH Davlat kotibi Entoni Blinken Gruziya hukumatini “tinch yigʻilishlar va oʻz fikrlarini bildirish huquqidan” foydalangani uchun hibsga olinganlarni “zudlik bilan ozod qilishga” chaqirgan edi.

Gruziya poytaxtida 15 kundan beri namoyishlar davom etmoqda. Namoyishchilar barcha hibsga olinganlarning ozod etilishini, shuningdek, parlament deputatlarining qayta saylanishini talab qilmoqda.

Oʻz navbatida, Tbilisi meri va hukmron “Gruziya orzusi – Demokratik Gruziya” partiyasi bosh kotibi Kaxa Kaladze respublikadagi norozilik namoyishlaridan maqsad davlat toʻntarishi ekanligini aytdi.