Illyustrativ foto

AQSHning Erondagi virtual elchixonasi oʻz fuqarolarini imkoni boricha tezroq Eronni tark etishga chaqirdi. Bu xabar ikki davlat oʻrtasidagi xavfsizlik bilan bogʻliq vaziyat tobora keskinlashayotgan bir paytda eʼlon qilindi.

Rasmiy maʼlumotga koʻra, Eronda xavfsizlik choralari kuchaytirilgan, ayrim yoʻllar yopilgan, jamoat transporti ishida uzilishlar kuzatilmoqda hamda internet va aloqa tarmoqlariga kirish cheklangan. Shuningdek, aviakompaniyalar Eronga va Erondan reyslarni qisqartirmoqda yoki bekor qilmoqda.

Taʼkidlanishicha, AQSH fuqarolari internet uzilishlari davom etishini inobatga olib, alternativ aloqa usullarini rejalashtirishi va xavfsiz deb hisoblagan taqdirda Eronni quruqlik orqali Armaniston yoki Turkiya tomon tark etishi lozim. Shu bilan birga, parvozlar kutilmagan holda bekor qilinishi mumkinligi sabab aviakompaniyalar bilan doimiy aloqa qilish tavsiya etilgan.

Maʼlum qilinishicha, 5-fevral holatiga koʻra, Eron–Armaniston (Agarak/Norduz) va Eron–Turkiya (Gyurbulak/Bozargon, Kapikoʻy/Razi, Esendere/Serov) chegara punktlari ochiq. AQSH fuqarolari ushbu mamlakatlarga vizasiz belgilangan muddatga kirish huquqiga ega. Turkmanistonga kirish uchun esa maxsus ruxsat talab etiladi, Ozarbayjonning quruqlik chegaralari odatiy harakat uchun yopiq qolmoqda.

AQSH hukumati Eron bilan diplomatik munosabatlarga ega emasligi sabab, Qoʻshma Shtatlar manfaatlarini Tehrondagi Shveysariya elchixonasi himoya qilmoqda. Shu munosabat bilan AQSH fuqarolari xavfsizlikka oid yangiliklarni kuzatib borishi, ommaviy namoyishlardan yiroq boʻlishi va zarurat tugʻilganda qoʻshni davlatlardagi AQSH elchixonalari bilan bogʻlanishi soʻralgan.