Senatning 11-yalpi majlisida “Aholini ijtimoiy himoya qilish tizimi yanada takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonun muhokama qilindi.

Qayd etilganidek, soʻnggi yillarda mamlakatimizda kam taʼminlangan oilalarni qoʻllab-quvvatlash, nogironligini boʻlgan shaxslarning jamiyatga moslashishi uchun qulay sharoitlar yaratish, shuningdek kasbga oʻrgatish va imtiyozlar berish orqali ularning bandligini taʼminlash hamda moddiy ahvolini yaxshilashga qaratilgan keng koʻlamli ishlar amalga oshirilmoqda.

Senatorlar tomonidan taʼkidlanganidek, mazkur Qonun ham ushbu islohotlarning mantiqiy davomi sifatida ishlab chiqilgan boʻlib, bu boradagi ishlarni amalga oshirishda yuzaga kelayotgan muammolarning oldini olishga qaratilgan.

Qonun bilan Maʼmuriy javobgarlik toʻgʻrisidagi kodeksga shaharsozlik hujjatlarida nogironligi boʻlgan shaxslarga shart-sharoitlar yaratish boʻyicha loyihaning alohida boʻlimiga (qismiga) amal qilinmagan holda qurilishi tugallangan binolar va inshootlardan foydalanish uchun Qurilish va uy-joy kommunal xoʻjaligi sohasida nazorat qilish inspeksiyasi organlari tomonidan ruxsatnoma berganlik uchun maʼmuriy javobgarlik belgilanmoqda.

Shuningdek, qonun bilan Ijtimoiy himoya milliy agentligi va uning tizimidagi idoralar xodimlarining qonuniy faoliyatiga toʻsqinlik qilish hamda ularning qonunchilik hujjatlarida belgilangan talablarini bajarmaganlik uchun maʼmuriy javobgarlik nazarda tutilmoqda.

Bundan tashqari, Maʼmuriy javobgarlik toʻgʻrisidagi kodeksining 47²-moddasi (Ota-ona qaramogʻidan mahrum boʻlgan bolalarni joylashtirishda qonunchilik talablarini buzish), 48-moddasi (Vasiylik huquqini suiisteʼmol qilish), 51¹-moddasi (Nogironligi boʻlgan shaxslarning huquqlari toʻgʻrisidagi qonunchilikni buzish) boʻyicha maʼmuriy ishlarni koʻrib chiqish jinoyat ishlari boʻyicha sudlardan Ijtimoiy himoya milliy agentligi huzuridagi Ijtimoiy inspeksiya vakolatiga oʻtkazilmoqda hamda Ijtimoiy inspeksiya organlari tomonidan koʻrib chiqiladigan maʼmuriy ishlar belgilab berilmoqda.

Eng muhim oʻzgarishlardan yana biri Ijtimoiy himoya yagona reyestriga yoki Kambagʻal oilalar reyestriga kiritilgan oilalar aʼzolariga qonunchilikda belgilangan tartibda roʻyxatdan oʻtkazilgan homiylik tashkilotlari tomonidan soliq davri mobaynida bazaviy hisoblash miqdorining yuz baravarigacha miqdorda toʻgʻridan-toʻgʻri beriladigan pul mablagʻlari tarzidagi homiylik xayriyalari uchun soliq solinmasligi, shuningdek, nogironligi boʻlgan shaxslar, faxriylar, xotin-qizlar hamda bolalar jamoat birlashmalarini davlat roʻyxatidan oʻtkazish uchun davlat boji belgilangan stavkaning 50 foizi miqdorida undirilishi mustahkamlanmoqda.

Muhokama jarayonida senatorlar tomonidan ushbu Qonunning qabul qilinishi ijtimoiy himoyaga muhtoj aholi qatlamining turmush darajasi yaxshilanishiga, ularga jamiyat va davlat hayotida toʻlaqonli ishtirok etishi uchun zarur shart-sharoitlar yaratilishiga, ijtimoiy yordam va xizmatlar koʻrsatishda ularga taalluqli boʻlgan maʼlumotlarni (shifokor va bank siriga oid, notarial harakatlar, qimmatli qogʻozlar toʻgʻrisidagi maʼlumotlarni) oʻrganish orqali Davlat byudjetidan ijtimoiy himoyaga ajratilgan mablagʻlarning manzilliligini taʼminlashga xizmat qilishi taʼkidlandi.

Qonun senatorlar tomonidan maʼqullandi.