Toshkent davlat agrar universiteti tashkil etilganligining 95 yilligi munosabati bilan “Global iqlim oʻzgarishi sharoitida qishloq xoʻjaligini barqaror rivojlantirish va oziq-ovqat xavfsizligini taʼminlash” mavzusida xalqaro ilmiy-amaliy konferensiya boʻlib oʻtdi.

Konferensiyada Oliy Majlis Senati aʼzolari, shuningdek, xorijiy ekspertlar hamda xalqaro tashkilotlar vakillari ishtirok etdi.

Global iqlim oʻzgarishining qishloq xoʻjaligi sohasiga taʼsiri, resurslardan oqilona foydalanish, barqaror agroekotizimlarni shakllantirish, oziq-ovqat xavfsizligini taʼminlash va ekologik muvozanatni saqlash masalalari muhokama qilindi.

Senatorlar oʻz chiqishlarida qishloq xoʻjaligi tarmogʻida ilm-fan integratsiyasini chuqurlashtirish, iqlim oʻzgarishiga moslashuvchan ishlab chiqarish tizimlarini yoʻlga qoʻyish va oziq-ovqat xavfsizligini taʼminlash borasida olib borilayotgan islohotlar muhim ahamiyat kasb etishini taʼkidlab oʻtishdi.

Qurgʻoqchilikka chidamli navlar seleksiyasi bilan shugʻullanish, suv tejovchi texnologiyalarni qoʻllash, suv isteʼmolini sunʼiy intellekt orqali avtomatik nazorat qilish va qishloq xoʻjaligini zamon talablariga mos ravishda rivojlantirish xususida fikrlar bildirildi.

Tadbir yakunida ishtirokchilar tomonidan ilmiy hamkorlikni kengaytirish, iqlim oʻzgarishiga mos barqaror rivojlanish strategiyalarini ishlab chiqish va ularni amaliyotga tatbiq etish boʻyicha qator takliflar bildirildi. Shuningdek, xalqaro tajriba asosida ilgʻor innovatsion texnologiyalarni joriy etish va yosh mutaxassislarni tayyorlash boʻyicha hamkorlik istiqbollari ham belgilab olindi.