Foto: president.uz

Prezident huzurida elektrotexnika sohasida yangi zaxiralarni safarbar qilish boʻyicha yigʻilish boʻlib oʻtmoqda. Bu haqda Prezident matbuot kotibi Sherzod Asadov xabar berdi.

Yigʻilishda elektrotexnika tarmogʻida izlanish va rivojlantirish (R&D) boʻyicha alohida dastur amalga oshiriladi.

Bunda, tarmoq mutasaddilari va korxonalari yil yakuniga qadar:

— «Elektroapparat» (muqobil energetika va kuchlanish uskunalari boʻyicha izlanishlar), “Texnopark” (murakkab qoliplar), “Artel” (maishiy texnika yangi modellari), «Uzkabel» (yangi izolyatsiya materiallari va kabel) negizida 4 ta R&D markazini tashkil etadi;

— ushbu markazlarga malakali xorijiy va mahalliy mutaxassislar jalb qilinadi;

— markazlar uchun Innovatsiya jamgʻarmasidan 10 milliard soʻm grantlar ajratiladi.

Moliya vazirligiga R&D markazlarini qoʻllab-quvvatlash uchun uch yil muddatga:

— mol-mulk va yer soliqlari boʻyicha hisoblangan summaning 1 foizini toʻlash;

— ijtimoiy soliq stavkasini 1 foiz miqdorida belgilash boʻyicha qonun loyihasini kiritish topshirildi.

Yetakchi xorijiy kompaniyalarni jalb qilib, «Oʻzeltexsanoat» uyushmasi huzurida Loyihalash va injiniring markazini tashkil etish vazifasi qoʻyildi.