DXX markaziy apparatida Vatanimiz mustaqilligining 29 yilligi bayrami munosabati bilan Oʻzbekiston Respublikasi Prezidentining Farmoniga muvofiq, milliy manfaatlarimizni himoya qilish, tinchlikni taʼminlash va barqarorlikni mustahkamlash borasida koʻrsatgan jasorat va fidoiyligi uchun davlatimizning yuksak mukofotlari bilan taqdirlangan bir guruh xodimlarga ushbu mukofotlarni tantanali topshirish marosimi boʻlib oʻtdi.

Unda Xizmat Raisi general-leytenant A.Azizov II-darajali “Shon-sharaf”, “Mardlik” ordenlarini, “Jasorat”, “Sodiq xizmatlari uchun” va “Shuhrat” medallarini oʻz egalariga topshirdi.

Shu oʻrinda taʼkidlash lozimki, yakunlanayotgan yil xalqimiz uchun sinovli keldi. Undan mardonavor oʻtishda respublikamiz aholisi matonat hamda bardoshini namoyon etdi. Bunda oʻz jonini xatarga qoʻyib boʻlsa-da, insonlar salomatligi va hayotini saqlab qolish uchun fidoiylik koʻrsatgan shifokorlarga davlatimiz tomonidan alohida eʼtibor qaratildi. Jumladan, “COVID-19” pandemiyasi davrida yuksak jasorat koʻrsatgan DXX tibbiy tuzilmalari xodimlari ham taqdirlandi. Ularga “Oʻzbekiston Respublikasida xizmat koʻrsatgan sogʻliqni saqlash xodimi” faxriy unvoni hamda “Sogʻlom turmush” medali topshirildi.