Foto: AFP

Avval xabar berganimizdek, shu kunlar Xitoy Tayvan atrofida yirik harbiy mashgʻulotlar oʻtkazmoqda.

Tayvan mudofaa vazirligi mamlakat hududini oʻrab turgan Xitoyning 153 ta samolyotni aniqlagan. 90 ta samolyot Tayvanning havo mudofaasini aniqlash zonasida topilgan. Harbiy samolyotlar faolligining oʻsishi seshanba kuni ertalab boshlangan va Xitoyning ushbu urush oʻyinlari orol hamda butun mintaqa bilan keskinlikni oshirgan.

Pekin dushanba kuni Tayvanni oʻrab olish uchun qiruvchi samolyotlar, dronlar, harbiy kemalar va qirgʻoq qoʻriqlash kemalarini joylashtirdi. Taypey bunga javoban tegishli kuchlarni joʻnatib, chetdagi orollarni qoʻriqlash uchun shay holatga keltirganini maʼlum qilgan edi.

Xitoy Tayvanni oʻzining bir qismi, deb biladi va uni qoʻlga kiritish uchun hech narsadan qaytmasligini aytib keladi. Tayvan prezidenti Uilyam Lay Pekin Tayvanga vakillik qilishga haqqi yoʻqligini va anneksiya yoki bosqinga qarshi turish majburiyatini eʼlon qildi.

AQSH mudofaa vazirligi Xitoyning ushbu harbiy mashgʻulotlarini “masʼuliyatsiz, nomutanosib va beqarorlashtiruvchi” deb qoraladi. Shuningdek, seshanba kuni AQSH va Filippinning minglab dengiz piyodalari Filippinda 10 kunlik qoʻshma mashgʻulotlarni boshladilar. Bu ham Xitoy bilan bahsli holat uygʻotadi. Mashqlar Tayvandan 800 km uzoqlikda joylashgan Filippinning asosiy oroli — Luzonning shimoliy qirgʻoqlarini himoya qilishga qaratilgan.