Фото: Иллюстратив cурат

Самарқанд шаҳрида жамоат транспорти жозибадорлигини ошириш мақсадида белгиланган режалар кўлами кенг ва ундан катта натижалар кутилмоқда.

Жорий йил якунига қадар режалаштирилган транспорт ва йўл-транспорт инфратузилмасини ривожлантириш бош режасига кўра, Самарқанд шаҳрига «электричка» қатнови йўлга қўйилади. Электропоезд Жума-Самарқанд-Булунғур йўналишида ҳаракатланиши режалаштирилмоқда.

— Электричка - замонавий жамоат транспорти шаҳар атрофидан қатновчилар учун қулайлик бўлади, — дейди Самарқанд вилоят транспорт бошқармаси бошлиғи ўринбосари Жўрабек Қоржовов. — У қатнайдиган йўналишда 7 та - Фарҳод шаҳарчаси, Аэропорт, Фотима Қосимова, Чортут, Чархин, Искандарий ва Тўқбой маҳаллаларида оралиқ бекатлар қурилади.

Бош режага асосан, «Самарқанд», «Шоҳи Зинда» ва «Сиёб» автостанциялари фаолияти тўхтатилади. Бу ерларга қатнайдиган йўналишларнинг охирги бекати Чўпон ота автовокзали бўлади. Яъни Булунғур, Жомбой туманлари ва шу билан бирга қўшни вилоятлардан келаётган жамоат транспортлари шаҳар ичига кирмайди. Улар янги қурилаётган автовокзалда барча йўловчиларини туширади, автобус ва маршрутка, енгил автомобиллар шу ердан йўловчи миндиради.

— Умуман, шаҳар атрофидан жамоат транспортларини кўҳна кентга «киритмаслик» биргина шундан иборат эмас, — дейди Ж.Қоржовов. — Режага кўра, йил охиригача туманлардан кириб келувчи магистраль йўлларда 3 та автотураргоҳ қурилади. Хусусан, М-37 Самарқанд ҳалқа йўлининг Самарқанд тумани Паррандачилик фабрикаси, М-37 Самарқанд халқа йўлининг Қундузсўфи маҳалласи ҳамда шу йўлнинг Чумчуқли маҳалласида туманларнинг сўнгги бекатлари жойлаштирилади.

Шаҳарнинг бир нуқтасидан иккинчи нуқтасига етиб олишда жамоат транспортидан фойдаланишни қулайлаштириш учун 27 километр масофада алоҳида йўлаклар ташкил этилади. Шунингдек, 10 та магистраль ва 33 та етказиб берувчи жамоат транспорти йўналишлари фаолияти йўлга қўйилади.

Яна бир янгилик шуки, жамоат транспорти учун янги тарифлар ишлаб чиқилади. Талаба, ўқувчи, пенционер, ногирон, оддий йўловчиларга алоҳида ва дифференциал тарифлар жорий қилинади.

Бундан ташқари Самарқанд шаҳрида 119 та бекат қурилади ва 158 та оралиқ бекатлар реконструкция қилинади. Бекатлар йўловчиларга зарур бўлган барча маълумотларни реал вақт режимида электрон тақдим этувчи мониторлар билан жиҳозланади.

Мавжуд 26 та кўча, Самарқанд халқа йўли ва Университет хиёбонига 78 дона ҳуқуқбузарликларни қайд этувчи кузатув камералари ўрнатилади. Шунингдек, велосипед йўлаклари қурилади.

Албатта, жорий қилиниши кўзда тутилган янгиликлар кўп, кутилаётган ижобий ўзгаришлар бу билан тугамайди. Мақсад «Шаҳар автомобиллар учун эмас, пиёдалар учун» деган тамойилга амал қилган ҳолда халқимизга сифатли ва қулай транспорт хизматини йўлга қўйишдан иборат.

Абдулазиз ЙЎЛДОШEВ, «Халқ сўзи».