Жанубий Корея президенти Юн Сок Ёль мамлакатда ҳарбий ҳолат эълон қилишга муваффақиятсиз уринганидан 4 ой ўтиб, лавозимидан бутунлай четлаштирилди. Энди мамлакатда 60 кун ичида янги президент сайловлари ўтказилиши керак, деб хабар бермоқда «BBC» нашри.

Маълум қилинишича, Конституциявий суд Юн Сок Ёлнинг импичменти ҳақидаги қарорни ўз кучида қолдирган. Президентга қарши импичментни қўллаб-қувватлаш учун 8 нафар судья иштирок этган. Улар Жанубий Корея президентининг ҳаракати ҳамда қарорлари конституция, қонун устуворлиги ҳамда демократия тамойилларини бузганини айтиб ўтган.

Маълумки, 2024 йилнинг декабрь ойида Юн Сок Ёль мамлакатда ҳарбий ҳолат эълон қилишга уринган эди. Шундан сўнг мамлакат парламенти президентни давлатда исён кўтаришда айблаб, унга нисбатан импичмент эълон қилган ҳамда вазифасидан четлатилган, бироқ Юн Сок Ёль расман Жанубий Корея президенти бўлиб қолган. Президентни ўз лавозимидан тўлиқ четлатиш учун Конституциявий суднинг қарори керак бўлган.

Таъкидланишича, Юн Сок Ёль исёнга уриниш айбловларини рад этган ва эълон қилган ҳарбий ҳолат тўғрисидаги қарори давлатни мухолифатдан ҳимоя қилиш учун қабул қилинганини маълум қилган. Президентнинг адвокатлари Конституциявий суддаги иш ноқонуний кўриб чиқилганлиги ҳамда қарор адолатсиз қабул қилинганлигини билдирган.

Эслатиб ўтамиз, жорий йилнинг март ойида суд президент Юн Сок Ёлни ҳибсдан озод қилиб, унга қарши ҳибсга олиш ордерини бекор қилганди.