Самарқанддаги “Ипак йўли” халқаро туризм марказида спортнинг триатлон тури бўйича ҳарбийлар ўртасида ўтказилаётган 25-жаҳон чемпионатининг яккалик баҳсларида ғолиблар аниқланди.

Эркаклар ўртасида “Elite” тоифасида франциялик триатлончилар Дориан Коннинх ва Натҳан Лессман ғолиб бўлган бўлса, учинчи ўринни ўзбекистонлик спортчи Жереме Куиндос эгаллади.

Катталар ўртасида “Senior” йўналишида россиялик Кирилл Голдовиский маррага биринчи бўлиб етиб келди. Иккинчи ўринни франциялик Боулч Бертранд, учинчи ўринни португалиялик Невес Марсио эгаллади.

Мусобақа натижасига кўра, хотин-қизлар ўртасида “Elite” тоифасида франциялик ҳарбий триатлончи Матилда Гаутиер финишга биринчи бўлиб етиб келди. Словениялик Тжаша Вртачич иккинчи, яна бир франциялик спортчи Селия Мерле учинчи бўлди.

Катталар ўртасида “Senior” йўналишида россиялик Анастасия Абросимовага тенг келадигани топилмади. Кейинги ўринлар канадалик Сара Гравес ва испаниялик Лорето Пастор Сопеланага насиб этди.

Мусобақада иштирок этган триатлончиларимиз орасида самарқандлик Алина Ҳакимова кучли бешликдан жой олди.

Бугун ҳарбийлар ўртасидаги 25-жаҳон чемпионатининг жамоавий баҳслари бўлиб ўтмоқда. 13 мамлакат спортчилари эстафета тартибида 300 метрга сузиш, 6 километр велосипед пойгаси, 1,6 километрга югуриш босқичида иштирок этмоқда. Мусобақада тўрт нафар ўзбекистонлик ҳарбий триатлончи юртимиз шарафини ҳимоя қиляпти.

Абдулазиз ЙЎЛДОШЕВ

(«Халқ сўзи»).