Украина президенти Владимир Зеленский Ғарб давлатларини қаттиқ танқид қилиб, улар ишлаб чиқараётган таркибий қисмлар Россия дронларида ишлатилаётганини маълум қилди.

Зеленскийнинг айтишича, 5 октябрга ўтар кечаси бўлиб ўтган кенг кўламли ҳужум пайтида Россия Украина шаҳарларига 100 мингдан ортиқ хорижий қисмлардан тузилган 549 турдаги қуроллар билан зарба берган.

Украина раҳбари айрим давлатларни, жумладан АҚШ, Германия, Швейцария ва Буюк Британияни, санкцияларга қарамай, Россияга таркибий қисмлар етказиб беришни тўхтатмаганликда айблади. Унинг сўзларига кўра, дронлардаги микроконтроллерлар Швейцарияда, парвозни бошқариш блоклари эса Буюк Британияда ишлаб чиқарилган.

Шунингдек, Зеленский Россия Украина инфратузилмасини йўқ қилишда давом этаётгани ва қишдан олдин энергетика иншоотларини қасддан вайрон қилаётганини таъкидлади.

«Афсуски, дунёда бу воқеаларга муносиб, қатъий ва кучли муносабат йўқ. Шу боис Путин шундай йўл тутяпти — у Ғарбнинг сукунати ва қатъий ҳаракатлар йўқлигига куляпти», — деди Украина президенти.

Украина расмийларига кўра, 6 октябрга ўтар кечаси Россия мамлакат бўйлаб 500 га яқин дрон ва 50 дан ортиқ ракета учирган. Ҳужумлар натижасида камида 5 киши ҳалок бўлиб, ўнлаб одамлар яраланган.