Ўзбекистон Республикаси мудофаасига кўмаклашувчи «Ватанпарвар» ташкилотининг Ҳазорасп туман ўқув-спорт техника клубига қарашли янги автодром фойдаланишга топширилди.

Шу муносабат билан ўтказилган тадбирда сўзга чиққанлар ёшларни ватанпарварлик руҳида тарбиялаш, чақирилувчиларни ҳарбий-техник мутахассисликлар бўйича тайёрлаш борасида амалга оширилаётган ишлар ҳақида тўхталиб, янги қуриб ишга туширилган автомобиль ўқув-машқ майдони ана шу эзгу мақсадларга хизмат қилишини таъкидлади.

— Автомототранспорт ҳайдовчилари тайёрлаш мактабларида назарий билимлар ва амалий машғулотларнинг уйғунлигини таъминлаш мақсадида вилоятимизда инновацион технологиялар билан жиҳозланган учинчи автодромни ишга туширдик, — дейди “Ватанпарвар” ташкилоти Хоразм вилояти Кенгаши раиси Давронбек Иброҳимов. – Шу билан бир қаторда мазкур автомактаблар учун янги енгил ва юк автомобиллари харид қилинди. Амалий машқларни бундай шароитларга эга автодромларда ўтказган ҳайдовчилар зарур кўникмаларга эга бўлади ва бу келгусида йўл-транспорт ҳодисаларининг олдини олишга ёрдам беради.

Одилбек ОДАМБОЕВ

«Халқ сўзи»