«Ўқувчи-ёшларни чақирувга қадар бошланғич тайёрлаш тизимини янги босқичга олиб чиқиш чора-тадбирлари тўғрисида»ги Президент қарорига мувофиқ «Жасорат мактаби»ни аъло баҳолар билан тамомлаганларга ўқишга кириш учун имтиёзли тавсиянома берилади.

Янги меъёрларга кўра, ҳар бир туман (шаҳар)да битта умумий ўрта таълим мактаби негизида «Жасорат мактаби» фаолияти йўлга қўйилади.

Шунингдек, «Жасорат мактаблари»да математика, ЧҚБТ, тарих, жисмоний тарбия, чет тили, физика фанлари чуқурлаштирилган ҳолда ўқитилади.

Бундан ташқари, ўқиш учун ўқувчиларни саралаш 5-синфдан бошлаб амалга оширилади. «Жасорат мактаблари»да робототехника, келажак ўйинлари, тиббий тайёргарлик, ҳуқуқий саводхонлик, миллий спорт ўйинлари каби тўгарак машғулотлари ҳам ўтказилиши режалаштирилмоқда.

Шу тариқа, ушбу мактаб ўқувчилари ўқув йили давомида икки марта ҳарбий полигонларда, ҳар чоракда бир марта ҳарбий қисмларда амалий машғулотлар олиб борилади.

2026/2027 ўқув йилидан бошлаб «Жасорат мактаби»ни аъло баҳолар билан тамомлаган ҳар бир «Ватан таянчи» отрядининг аъзоси бўлган бир нафар ўқувчига олий ҳарбий ва ҳарбийлаштирилган ҳамда юридик таълим муассасаларига ўқишга кириш учун имтиёзли тавсиянома берилади.

Қайд этилишича, таълим ташкилотларида ёшларни ватанпарварлик руҳида тарбиялашда «Турон» мактаб театри танлови ўтказиб борилади.