Фото: AP

АҚШнинг машҳур ESPN нашри вазн тоифасидан қатъи назар энг кучли 10 нафар боксчи рейтингини эълон қилди. Унда биринчи ўрнини украиналик боксчи Александр Усик жой олди. Бу билан у нафақат оғир вазн тоифасида, балки барча боксчилар ўртасида ҳам етакчи сифатида эътироф этилди.

Александр Усик шу кунгача профессионал боксда 23 та жанг ўтказиб, уларнинг барчасида ғалаба қозонган. Иккинчи ўринни япониялик Наоя Иноуэ эгаллади. У 30 та жангдан буён енгилмай келяпти. Кучли учликни эса АҚШлик боксчи Теренс Кроуфорд якунлади — унинг ҳисобида 41 ғалаба бор.

Тўртинчи поғонани россиялик Дмитрий Бивол эгаллаган бўлса, бешинчи ўринга яна бир россиялик Артур Бетербиев жойлашган. Иккаласи ҳам сўнгги йилларда ўзининг ёрқин фаолияти билан танилган спортчилардир.

Олтинчи ўринда Жесси Родригес (АҚШ) жой олди — у ҳозиргача 21 та жангда мағлубиятга учрамаган. Еттинчи ўринда Мексика афсонаси Сауль «Канело» Альварес турибди. Унинг ҳисобида 69 та ғалаба, 2 мағлубият ва 2 дуранг бор.

Саккизинчи ўрин АҚШлик Давид Бенавидесга насиб этди. У ҳам ҳали мағлубият нималигини билмаган. Рейтингни япониялик Дзунто Накатани (30-0) ва АҚШ вакили Шакур Стивенсон (23-0) каби тенги йўқ боксчилар якунлаб берган.

ESPNнинг бу рейтинги боксчиларнинг спорт формаси, техник устунлиги ва кейинги йилларда ғалабалари асосида тузилган бўлиб, мухлислар ва мутахассислар орасида қизғин баҳсларга сабаб бўлиши кутилмоқда.