Абдулазиз ЙЎЛДОШЕВ/«Халқ сўзи». Самарқандда Ўзбекистон Республикаси Қуролли кучлари ташкил этилганлигининг 33 йиллиги ҳамда Ватан ҳимоячилари куни тантаналари Амир Темур мақбарасини зиёрат қилишдан бошланди.

Унда вилоят ҳокими вазифасини бажарувчи Адиз Бобоев бошчилигидаги вилоят фаоллари Амир Темур мақбарасида йиғилиб, ўтганлар руҳига Қуръон тиловат қилди.

Шундан сўнг вилоят ва шаҳар ҳокимликлари, ҳуқуқ-тартибот идоралари вакиллари ҳамда ҳарбийлар Амир Темур ҳайкали пойига гуллар қўйишди. Ватан ҳимоячилари куни муносабати билан ташкил этилган байрам тадбирлари вилоят мусиқали драма театрида давом этди. Вилоят ҳокими вазифасини бажарувчи Адиз Бобоев иштирокчиларни байрам билан табриклади.

Тадбирда бир гуруҳ ҳарбий хизматчилар, ҳуқуқ-тартибот идоралари ходимлари ҳокимликнинг фахрий ёрлиғи ҳамда совғалари билан тақдирланди.

Театр актёрларининг саҳна чиқишлари, санъаткорларнинг дилтортар қўшиқлари байрамга янада кўтаринкилик бахш этди.