Фото: AP

Буюк Британия ҳарбий раҳбарлари пайшанба куни мамлакат қуролли кучларига мисли кўрилмаган даражада таҳдид борлигини батафсил баён қилиб, Европа урушга тайёр бўлиши кераклиги ҳақида огоҳлантирди. Бу ҳақда “Politico” нашри хабар бермоқда.

“Уруш сояси Европа эшигини тақиллатмоқда”, — деган Буюк Британия мудофаа вазири Эл Карнс. Шу ўринда у НАТО иттифоқчиларини Россияга жавоб беришга тайёр бўлишга чақирган.

Ҳарбий амалдорининг сўзларига кўра, Европа энди “танлов урушлари”га эмас, балки кўп сонли инсоний йўқотишлар билан бирга келадиган “зарурий урушлар”га дуч келмоқда. Шу ўринда у Россияни Украинага бостириб киришини мисол қилиб келтирган.

Таъкидланишича, Британия ҳарбий хизматчилари ва мулкига қарши душманона разведка фаолияти сўнгги бир йил ичида 50 фоиздан кўпроққа ошган.

Аввалроқ, АҚШ президенти Дональд Трамп Украина можароси Учинчи жаҳон урушига айланиши мумкинлигини айтган эди.

“Мен бошқа куни айтган эдимки, агар ҳамма бу ўйинларни ўйнашда давом этса, сизлар Учинчи жаҳон урушига дуч келасизлар”, — деган эди Трамп. Оқ уй раҳбари шу ўринда АҚШ бундай бўлишини истамаслигини қўшимча қилди.

НАТО бош котиби Марк Рютте эса 11 декабрь куни “биз боболаримиз ва катта боболаримиз бошидан кечирган урушга тайёргарлик кўришимиз керак” деди.