Кўпчилик украиналиклар ва экспертлар фикрича, Владимир Путин Украина шарқидаги ҳудудий ютуқларини кенгайтириб, Дональд Трампни алдашга ҳаракат қилади.

Контузиядан тузалган тажрибали украиналик ҳарбий хизматчи Тарас АҚШ президенти Дональд Трамп ва Россия президенти Владимир Путин ўртасида 15 август куни ўтадиган саммитдан мўъжиза кутаётгани йўқ.

— Бир ҳафта ичида тинчлик битими тузилмайди. Путин Трампни Украина тинчликни истамайди, деб ишонтиришга ҳаракат қилади, — деди 32 ёшли Тарас Al Jazeera телеканалига.

Тарас уч йилдан ортиқ фронтда бўлган, яқинда эса портловчи моддалар ортилган рус дронини уриб туширган. Унинг айтишича, Путин иқтисодий санкциялардан қутулиш учун Трампни алдаб, шарқда катта ҳарбий натижа қўлга киритишни режалаштирмоқда.

Трамп маъмурияти Аляска саммитини ўт очишни тўхтатишга қаратилган катта қадам сифатида кўрса, украиналиклар — ҳам ҳарбийлар, ҳам тинч аҳоли — бу учрашувдан ижобий натижа кутаётгани йўқ.

Бу пессимизмнинг сабаби — фронтдаги вазият. Россия Донецк жануби-шарқида ҳужумларини кучайтирар экан, охирги уч ойда 1500 км² майдонни эгаллади. 2022 йилдаги кенг миқёсли босқин бошланганда Москва Украина ҳудудининг қарийб 27 фоизини назорат қилган, аммо Киевнинг қарши ҳужумлари ортидан бу кўрсаткич сезиларли қисқарган. Шундан бери Украина фақат 1 фоиздан камроқ ҳудудини қайтариб олган.

Айни пайтда, АҚШ ва Россия ўртасидаги музокаралар ҳақида тарқалган маълумотлар ҳам Киевда шубҳа уйғотган. Хабарларга кўра, Трамп Москвага Донецк ва Луганскни тўлиқ назорат қилиш эвазига ўт очишни тўхтатиш ва бошқа фронтларда вазиятни музлатишни таклиф қилиши мумкин.

АҚШнинг Урушни ўрганиш институти огоҳлантиришича, Донецкдан воз кечиш Россия қўшинларига фронтдаги кейинги ҳаракатлар учун қулай шароит яратади.

Президент Владимир Зеленский эса Украина ўз ерларини «ҳадя қилмаслигини» ва Ғарбдан қатъий хавфсизлик кафолатлари талаб қилинишини айтди. Унинг сўзларига кўра, ҳақиқий ва узоқ муддатли тинчликка эришиш учун ҳозирнинг ўзида оташкесим зарур.

Шу билан бирга, украиналиклардаги ишончсизликнинг яна бир сабаби — Трампнинг ўзига бўлган шубҳалар. Зеленский Аляскада уч томонлама учрашувга таклиф қилинадими ёки АҚШ Киевсиз Украина тақдирини муҳокама қиладими — бу номаълум.

Германиялик таҳлилчи Николай Митрохиннинг фикрича, Путин учун асосий мақсад — Трамп билан тенг ҳуқуқли суҳбат ўтказиш. Эҳтимол, саммит ҳаводан оташкесим ҳақидаги келишув билан тугаши ва Россияга Донецкни эгаллаш учун уч ой вақт берилиши мумкин. Бу вақт мобайнида Москва минглаб дрон ва юзлаб ракеталар захирасини тўплашга улгуради.

— Кейин Путин, албатта, Трампни алдайди ва уруш яна давом этади, — дея қўшимча қилди Митрохин.