Украинадаги тинчлик музокаралари уруш бошланганидан бери ҳар қачонгидан ҳам фаолроқ, деб хабар бермоқда BILD нашри.

Унда айтилишича, Украинадаги уруш атрофидаги дипломатик фаоллик шу ҳафта охири кескин кучайган ва тез орада тинчлик музокараларида бурилиш нуқтаси кўзга ташланиши мумкин. Украина, Германия, Франция ва Буюк Британия ҳукуматларининг катта маслаҳатчилари тез орада Парижда учрашиши режалаштирилган.

Шу йилнинг 15 декабрь куни Берлинда Европа етакчилари, Европа Иттифоқи ва НАТО иштирокидаги юқори даражадаги саммит бўлиб ўтади. Германия ҳукумати вакили Стефан Корнелиуснинг тасдиқлашича, Украина президенти Владимир Зеленский ҳам Германия пойтахтига боради.

Шунингдек, америкалик музокарачилар Стив Уиткофф ва Жаред Кушнер ҳам Берлинга боришлари режалаштирилган. Берлин томони бу ҳолатни Оқ уй томонларга босим ўтказаётгани ва тезкор келишувга эришишни истаётганининг белгиси сифатида кўрмоқда.

Сўнгги маълумотларга кўра, АҚШ президенти Дональд Трамп Украина етакчиси Владимир Зеленскийга қаттиқ босим ўтказмоқда ҳамда уни тинчлик музокараларига ён беришга ундамоқда. Бу ҳолат Украинадаги коррупция можароси фонида янада кучайган бўлиши эҳтимоли юқори.