Украинадаги фронт чизиғида «Биринчи жаҳон уруши касаллиги» авж олди. Шифокорлар «газ гангренаси» ҳолатларини қайд этмоқда. Бу ҳақида BILD нашри маълум қилди.

Билдирилишича, Украинада тиббиёт ходимлари ноёб ва ўта хавфли инфекция, илк бор Биринчи жаҳон урушида қайд этилган «газ гангренаси»га чалиниш ҳолатларини қайд этишмоқда. «The Telegraph» нашрининг украиналик ҳарбий шифокорларга таяниб хабар беришича, «Clostridium perfringens» бактерияси келтириб чиқарадиган касалликнинг бир нечта тасдиқланган ҳолатлари аллақачон қайд этилган.

Маълум бўлишича, ушбу инфекция ифлосланган яралар орқали пайдо бўлади. Таъкидланишича, Россия дронларининг доимий ҳужумлари натижасида ҳудуддаги ярадорларни эвакуация қилиш бир неча ҳафтага кечикмоқда. Ҳудуддаги тиббиёт ходимлари жароҳатланганларга етарли даражада ёрдам кўрсата олмаётганини билдирган. Тиббиёт пунктлари жойлашган бункерлар ва ер ости касалхоналари стерил муолажалар учун жиҳозланмаган ва тиббий карвонларга қилинган ҳужумлар туфайли дори-дармонларни етказиб бериш сурункали равишда ортга сурилмоқда.

Маълумотларга кўра, «газ гангренаси» шикастланган тўқималарга ҳужум қилади. Бу эса кучли оғриқ, шиш ва тери остида газ пуфакчалари пайдо бўлишига олиб келади. Инфекция зудлик билан антибиотиклар ва кўпинча оёқ-қўлларни ампутация қилиш йўли билан зарарсизлантирилади. Бироқ, украиналик шифокорлар вақт ўтгани сари антибиотикларга чидамли бактерияларга дуч келмоқда. Ушбу ҳолат эса вирус билан касалланган беморларни даволашни янада қийинлаштиради. Дори-дармонлар ва вақт етишмаслиги туфайли, омон қолган кўплаб ярадорлар фронт чизиғида вафот этмоқда.