Иллюстратив фото

18 июлдан 19 июлга ўтар кечаси Украина дронлари Россиянинг бир қанча шаҳарларига ҳужум уюштирди.

Қайд этилишича, ҳужум натижасида Шереметево ва Домодедово аэропортлари вақтинча самолётларни қабул қилиш ва жўнатишни тўхтатди. Шунингдек, алоқа тармоғига зарар етказилгани туфайли 50 дан ортиқ поезд қатновлари кечиктирилган.

Россия Мудофаа вазирлиги маълумотига кўра, ҳаво мудофаа кучлари 71 та дронни уриб туширган. Улардан 13 таси Москвага яқинлашаётганида йўқ қилинган. Шу сабабли Шереметево ва Домодедово аэропортлари вақтинча самолётларни қабул қилиш ва жўнатишни тўхтатган.

Москва вилоятининг Дмитров туманида дрон қулаганидан сўнг электр узатиш линияси зарар кўрган. Бу ҳодисада ҳеч ким жабрланмагани айтилмоқда.

Ростов вилоятида эса Каменск-Шакҳтинский шаҳрига уюштирилган дрон ҳужуми натижасида бир нечта уйлар ёниб кетган, бир киши жароҳат олган. Ҳудуддаги Каменский туманида электр трансформатори ёниб кетган, натижада қарийб 2000 киши электр таъминотисиз қолган.

Шу билан бирга Ростов вилоятида қулаган дрон парчалари темирйўл контакт линиясини шикастлаган. Натижада узоқ масофали 50 дан ортиқ поезднинг ҳаракати кечиктирилган.