Архив сурат

Сўнгги ҳафталарда Суми вилояти Россия артиллерияси томонидан ўққа тутилиши оқибатида бир киши ҳалок бўлиб, тўрт нафари яраланган. Украина полицияси сўнгги 24 соат ичида Москва кучлари ҳудудни 224 марта ўққа тутганини айтди. Украина Россия томонидан босиб олинган Луганск шаҳридаги нефть омборига зарба йўллаганидан сўнг йирик ёнғин содир бўлган, 5 киши жароҳатланган.

Украина Хавфсизлик хизмати (УХХ) Россиянинг Украина президенти Владимир Зеленский ва бошқа юқори мартабали амалдорларга суиқасд уюштириш режасини фош қилганини маълум қилди. УХХ Россия Федерал хавфсизлик хизмати режани амалга ошириш учун агентлар тармоғини ташкил этгани ва юқори мансабдор шахсларни ҳимоя қиладиган икки полковникни гумондор сифатида қўлга олгани ҳақида хабар берди.

Владимир Путин бешинчи муддатга Россия президенти сифатида қасамёд қилди. Давлат раҳбари ўз нутқида мамлакат оғир даврдан ғалаба билан чиқишини айтган. Ушбу инаугурация маросимини АҚШ, Буюк Британия ва Европа Иттифоқининг бир қанча давлатлари бойкот қилгани маълум. Бир неча ўнлаб намойишчилар Гаага Тинчлик саройи олдида тўпланган. Путиннинг қасамёд маросимига қарши норозилик билдириб, уни судга чақиришгани айтилмоқда.

Хитой Халқ Республикаси президенти Си Сзинпин икки кунлик сафаридан сўнг Францияни тарк этиб, Европанинг бошқа давлатларига йўл олган. Эммануэль Макрон уни Украинадаги урушни тугатишга ёрдам бериш учун Россияга таъсиридан фойдаланишга ундаган.

Зеленскийнинг айтишича, Кабо-Верде орол давлати келаси ой Швейцарияда бўлиб ўтадиган тинчлик саммитида қатнашишга рози бўлган биринчи Африка давлатига айланди. 15-16 июнь кунлари бўлиб ўтиши режалаштирилган тадбирга мезбон давлат 160 та делегацияни таклиф этган.

АҚШда жойлашган «Freedom House» нотижорат ташкилотини Россияда таъқиқланди. Ушбу тузилма 2024 йилги дунё давлатларининг эркинлиги ҳақида тайёрлаган рейтингида Россия «Эркин бўлмаган» мақомини олган. Шунингдек, Москванинг Киевга бостириб кирганидан кейин сиёсий ҳуқуқ ва фуқаролик эркинликларига нисбатан чекловлар кучайтирилганлиги қайд этилган.

Руминия президенти Клаус Йоханнис АҚШга ташрифи чоғида Украинага «Patriot» ракета тизимини юбориш бўйича музокараларга очиқ эканини айтди. Руминия 2017 йилда «Patriot»ларни харид қилиш учун 4 миллиард долларлик шартнома имзолаган ва унинг биринчи партиясини 2020 йилда қабул қилиб олган эди.