Фото: Reuters

Франция ва Буюк Британия бошчилигидаги Украинага қўшин юбориш бўйича «кўнгиллилар коалицияси» АҚШнинг позицияси туфайли «барбод бўлган» бўлиши мумкин.

«Bloomberg» агентлигининг ёзишича, коалиция Оқ уйдан Украинага хавфсизлик кафолатларини бериш бўйича қатъий мажбуриятларни ололмаган.

Манбага кўра, Буюк Британия ва Франция АҚШ президенти Дональд Трампни аскар жўнатиш ўрнига ҳаво кучлари, чегара назорати ва разведка хизматларини юборишга кўндирмоқчи бўлган. Бироқ Оқ уй раҳбари икки ой олдин, яъни режа тақдим этилганидан бери бундай мажбуриятларни олишдан бош тортган.

Агентлик, шунингдек, Буюк Британия Бош вазири Кир Стармернинг Қўшма Штатлар ўз кафолатларини бериши кераклиги ҳақидаги сўзларини эслатиб ўтди, чунки бу Россияни тутиб туришнинг ягона йўли.

Шу йилнинг 8 апрель куни Украина етакчиси Владимир Зеленский Украинага ёрдам беришга тайёр «кўнгиллилар коалицияси»нинг навбатдаги йиғилишини эълон қилди. У, бугун, 10 апрелга режалаштирилган. Музокараларнинг асосий мавзуларидан бири Европа давлатларидан тинчликпарвар кучларни жанговар ҳудудга юбориш эҳтимоли бўлади.

Украина ҳудудига тинчликпарварлик миссияси доирасида “кўнгиллилар коалицияси” кучларини жойлаштиришнинг аниқ вақти, шунингдек, қўшинлар сони ҳозирча номаълум. Кир Стармернинг аниқлик киритишича, ҳозирда кўплаб вариантлар кўриб чиқилмоқда, бироқ ҳозирча келишув йўқ.