Фото: Халқ сўзи

Бу туманда ушбу дармондорига бой неъматни йилнинг исталган фаслида топишингиз мумкин. Айни пайтда қулупнайзорларда жорий йил ҳосилини тўртинчи бор йиғиштиришга киришилган. Экинзорларнинг катта қисми Қирғизистонга чегарадош Ёғду маҳалласида жойлашган. Ички ишлар идораларидаги узоқ йиллик меҳнатдан сўнг нафақага чиққач, деҳқончиликнинг ушбу тури билан астойдил шуғулланишга киришган Муроджон Қосимовнинг саъй-ҳаракати билан қулупнайчилик ҳудуднинг асосий драйверига айланди. Айни пайтда уни туман бўйича 500 гектардан кўпроқ майдонда етиштиришяпти.

— “Назира опа” номли фермер хўжалигимизнинг уч гектар ерига 5 йилдан буён қулупнай парваришлаб келяпмиз, —дейди М. Қосимов. – Ҳосили йирик, пуштиранг мева берадиган “Charli” навли кўчатлар Францияники, уларни Тошкентдаги танишимдан олиб келганман. Ҳар етмиш кунда пишадиган ҳосилини кунора йиғиб олиш мумкин. Деҳқончилигимизнинг ўзига хос жиҳати, бизда қиш ойларида ҳам қулупнай пишади. Чунки, совуқ кунлар яқинлашиши билан экинзорларимизнинг ярим гектари устини махсус плёнкалар билан беркитиб, ёпиқ далага айлантирамиз. Тўғри, қулупнайчиликнинг меҳнати осон эмас, бироқ, даромади шунга яраша. Ҳар теримда 10-15 тоннага етказиб, мева терамиз. Шу экиннинг ўзидан 100 миллион сўмгача фойда оляпмиз. Бунга асалари, кўчат етиштириш, кўкат ва бошқа резаворлар парваришлашни ҳам қўшсак, манфаатдорлигимиз анчагина ортади.

Қулупнайчилик кенг йўлга қўйилиши билан Учқўрғонда агротуризмга ҳам йўл очилди. Маҳаллий, баъзида хорижлик сайёҳлар ҳам Ёғду маҳалласига келиб, бу ерда яшнаб турган экинзорлардан ҳайратга тушишади. Ота уларга эгатларда товланиб турган сархил мевани ўз қўллари билан териб олишларини таклиф қилади. Бунинг гашти ўзгача!

Яқинда етмиш ёшини қаршилаган Муроджон ота ҳали тетик. Маҳалладошлари, узоқ-яқиндан келган ҳавасмандларга қулупнайчилик сир-асрорларини ўргатишдан сира эринмайди. У шу кунларда яна бир лойиҳани амалга оширишга киришган. Қишда иситиладиган ва томчилатиб суғоришга асосланган мўъжаз иссиқхона қуриб, унга қулупнай кўчатларини беш қаватли қилиб жойлаштирмоқчи. Бу, ҳосилдорлик даражаси одатдагига қараганда беш баравар ортади, дегани. Тилагимиз, кексайганда тадбиркорлик йўлини тутиб, ёшларга ибрат бўлаётган отахоннинг ғайратига асло кўз тегмасин.

Қудратилла НАЖМИДДИНОВ, “Халқ сўзи”.