Жорий йилнинг 29 октябрь куни Олий Мажлис Сенати Раиси Танзила Нарбаева ва Сербия Президенти Александр Вучич ўртасида учрашув бўлиб ўтди.

Учрашувда икки мамлакат парламентлари ўртасидаги ҳамкорликни ривожлантириш масалалари муҳокама қилинди. Хусусан, парламентлараро муносабатларни мустаҳкамлаш, дўстлик гуруҳлари фаолиятини кучайтириш, қўшма лойиҳаларни амалга ошириш ҳамда олий даражада эришилган келишувларнинг самарали ижросини таъминлашда парламент назоратини амалга ошириш муҳимлиги қайд этилди.

Суҳбат чоғида Сербия Президенти А. Вучич мамлакатимизда Давлат раҳбарининг оқилона сиёсати асосида амалга оширилаётган кенг кўламли ислоҳотларни юқори баҳолади, шунингдек, Ўзбекистоннинг ташқи сиёсатидаги фаол ва ташаббускор позицияси ҳамда иқтисодий кўрсаткичларнинг барқарор ўсиб бораётганини тарихий аҳамиятга эга воқелик сифатида эътироф этди.

Ўзбекистон ҳамда Сербия ўртасидаги дўстлик, ўзаро ишонч ва ҳамкорлик муносабатлари изчил ривожланиб бораётганини алоҳида таъкидланди.

Сербия Президентининг Ўзбекистонга ташрифи икки мамлакат муносабатларида, шу жумладан парламентлараро алоқаларни ривожлантиришда янги босқични бошлаб бергани қайд этилди.