Копенгаген мудофаа харажатларини ошириб, иттифоқчилари билан музокаралар олиб бормоқда. Шунингдек, Дания Арктика ва Шимолий Атлантика минтақасида ҳарбий иштирокини кучайтириш режаларини ошкор қилган.

Мамлакат душанба куни хавфсизлик учун қўшимча 2 миллиард АҚШ долларидан кўпроқ маблағ ажратишни эълон қилди. Бу ислоҳот Европа давлати АҚШ президенти Доналд Трампнинг Гренландия устидан назоратни топшириш талабига қаршилик кўрсатаётган бир пайтда эълон қилинди.

«Европа жиддий вазиятга дуч келмоқда. Қитъадаги уруш ва геосиёсий қарашлар ўзгариб боряпти. Бундай дамларда бирдамлик жуда муҳим. Дания кучли иттифоқчиларга эга кичик давлат. Шунингдек, кучли Европа ҳамжамиятининг бир қисми бўлиб, дуч келган муаммоларни биргаликда енгамиз», — деди мамлакат етакчиси.

Арктикадаги музликларнинг эриши муҳим минерал ресурсларга эга бўлган Гренландияга янги юк ташиш йўлларини очиб, ҳудуднинг стратегик аҳамиятини янада оширди ва қимматбаҳо оролга айлантирди.

Шу ой бошида буён Трамп Гренландия АҚШ хавфсизлиги учун жуда муҳимлигини ва Дания назоратдан воз кечиши кераклигини айтганди.

АҚШ ҳарбийлари Гренландиянинг шимоли-ғарбий қисмидаги Питуффик космик базасида доимий мавжуд бўлиб, ўзининг баллистик ракеталарини эртароқ огоҳлантириш тизими учун стратегик жойлашувга эга, чунки Европадан Шимолий Америкага энг қисқа йўл орол орқали ўтади.

Ҳозирги вақтда Даниянинг имкониятларига тўртта эскирган текширув кемалари, «Чалленгер» кузатув самолёти ва 12 чана патруллари киради. Уларнинг барчаси Франциядан тўрт баравар катта ҳудудни кузатиш вазифасини бажаради.