АҚШ федерал ҳукуматининг самарадорлигини ошириш бўйича департаменти (DOGE), аввалроқ миллиардер Илон Маск раҳбарлик қилган мазкур тузилма, ваколат муддати тугашига саккиз ой қолгани ҳолда расман тугатилди. Бу ҳақда «Reuters» хабар бермоқда.

Аслида департамент фаолияти келаси йил июль ойида якунланиши режалаштирилган эди. Кадрлар бошқармаси (OPM) директори Скотт Купор «DOGE» ҳақида берган саволга:

— «Бундай тузилма мавжуд эмас», — деб жавоб берди. Унинг айтишича, бу эндиликда «марказлашган ташкилот» сифатида фаолият юритмайди.

«Reuters»га кўра, «DOGE»нинг кўплаб функциялари «OPM» тасарруфига ўтказилган.

Эслатиб ўтамиз, «DOGE» Дональд Трампнинг 20 январь куни инаугурация маросимида имзолаган илк фармонларидан бири сифатида ташкил этилганди. Департамент давлат харажатларини қисқартириш ва федерал агентликларни қайта тузиш билан шуғулланган.

Илон Маск департамент раҳбари этиб тайинланган эди. Май ойининг охирида унинг шартномаси муддати тугаганидан сўнг Маск лавозимни тарк этди. Бу қарор Трамп билан келиб чиққан келишмовчиликлар фонида қабул қилинган.

Маск кетганидан кейин «DOGE» ҳукуматдаги ўз таъсирини йўқота бошлади ва бир нечта муҳим ходимлар департаментни тарк этди.