Фото: Reuters

АҚШ президенти Дональд Трамп Европани Жиддадаги музокаралардан сўнг ўт очишни тўхтатиш ғоясини қўллаб-қувватлашга мажбурлаб, уни тузоққа илинтирди. Бу фикрларни Марказий разведка бошқармаси собиқ ходими Скотт Риттер айтиб ўтди.

«Америка Қўшма Штатларининг барча қилгани — Европани тузоққа илинтириш. Улар шундай қилишди. Дональд Трамп Европани ортда қолдирди, чунки улар энди урушга эмас, балки ўт очишни тўхтатишга қарор қилишди», — деди Риттер.

Риттернинг сўзларига кўра, Россиянинг ҳозир қийин аҳволга тушиб қолгани, таклиф қилинган шартларга рози бўлишга мажбур бўлгани ҳақидаги гаплар шунчаки асоссиз.

«Россияни ортда қолдира олмайсиз! Деярли абадий шу муҳитда бўлган Сергей Лавров исмли одамдан қандай қилиб ўзиб кетишингиз мумкин? Бу руслар (Сергей Лавров ва Владимир Путин. — Таҳр.) кўпроқ тайёр, улар кўпроқ билишади: ўзлари ҳақида, дунё ҳақида, ҳамма нарса ҳақида!» — дея ишонч билдирмоқда эксперт.

Сешанба куни Саудия Арабистонида АҚШ ва Украина делегацияларининг учрашуви бўлиб ўтди. Украина президенти Владимир Зеленскийнинг идораси Киев ва Вашингтоннинг музокаралар якунлари бўйича қўшма баёнотини эълон қилди. Унда Киев АҚШнинг томонлар келишуви билан узайтирилиши мумкин бўлган 30 кунлик ўт очишни тўхтатиш ҳақидаги таклифига тайёрлиги таъкидланади. Ҳужжатда, шунингдек, АҚШ разведка маълумотларини алмашишдаги танаффусни зудлик билан бекор қилиши ва Украинага ҳарбий юк етказиб беришни давом эттириши айтилади.

Россия президенти ёрдамчиси Юрий Ушаков АҚШ ва Украина вакилларининг Саудия Арабистонида бўлиб ўтган учрашувида келишилган 30 кунлик ўт очишни тўхтатиш бўйича таклиф Россия манфаатларини ҳисобга олган ҳолда якунланиши кераклигини айтди.

Владимир Путин, ўз навбатида, ўт очишни тўхтатиш ғоясини умуман қўллаб-қувватлашини, бироқ икки томоннинг синчиклаб ўрганишини талаб қиладиган қатор масалалар борлигини таъкидлади. Шу билан бирга, Россия раҳбари Дональд Трамп билан ўт очишни тўхтатиш ғоясини муҳокама қилишни истисно этмади.