АҚШ президенти Дональд Трамп мамлакатда машҳур «Coca-Cola» ичимлигининг таркибини ўзгартиришга рози бўлганини маълум қилди. Унинг таъкидлашича, компания АҚШдаги маҳсулотларида ҳозирда ишлатилаётган маккажўхори сиропи ўрнига шакарқамишдан олинган сахарозадан фойдаланишга ўтади. Бу қарорни Трамп жамоатчиликка ижобий янгилик сифатида эълон қилиб, бундай ўзгариш нафақат таъм жиҳатидан, балки соғлиқ учун ҳам фойдали бўлишини таъкидлади.

«Coca-Cola» компанияси бу борада расмий тасдиқ бермаган бўлса-да, президентнинг брендга бўлган қизиқишини юқори баҳолади ва яқин кунларда янги маҳсулотлар ҳақида кенгроқ маълумот берилишини билдирди. Компания раҳбари Жеймс Квинси эса бу йил апрель ойидаги чиқишида компаниянинг ичимликлардаги шакар миқдорини қисқартиришга йўналтирилган стратегик ҳаракатлари давом этаётганини билдирган эди.

Шу билан бирга, қамиш шакарига ўтиш қарори мамлакатдаги маккажўхори ишлаб чиқарувчилари орасида норозиликларга сабаб бўлиши мумкин. Маккажўхори қайта ишлаш саноати вакиллари бу ўзгариш минглаб иш ўринларининг қисқариши, фермерлар даромадининг камайиши ва четдан импорт қилинадиган шакар ҳажмининг ошишига олиб келиши мумкинлигини билдирмоқда. Маккажўхори қайта ишлаш ассоциацияси раҳбари Жон Боуд бу ўзгариш АҚШ озиқ-овқат саноатида салбий оқибатларга сабаб бўлиши мумкинлигини таъкидлади.

Соғлиқни сақлаш вазири Роберт Кеннеди ҳам президент ташаббусини қўллаб-қувватлади. Унинг фикрича, маккажўхори сиропи билан тайёрланган ичимликлар инсон саломатлиги учун хавфли бўлиб, табиий қамиш шакарига ўтиш бу муаммонинг ечимидир. Шу тариқа, «Coca-Cola» таркибидаги ўзгариш нафақат бозор стратегиясини, балки саломатлик сиёсатига таъсир қилувчи омил сифатида ҳам қаралмоқда.