Фото: "Халқ сўзи"

Ботир Мадиёров/“Халқ сўзи”. Айни кунларда Бешариқ туманининг қўшни Тожикистон билан чегарадош ҳудудда жойлашган “Андархон” назорат-ўтказиш пункти ёнида замонавий савдо-логистика маркази қурилиши жадал давом этмоқда.

“Қўқон” эркин иқтисодий зонаси тасарруфидаги ушбу савдо-логистика маркази 6 гектар майдонда ташкил этилади. Истиқболли лойиҳа доирасида 86 миллиард сўм маҳаллий инвестиция маблағи йўналтирилиб, мажмуада 200 та савдо дўконлари, меҳмонхона, банк, логистика маркази ҳамда кафе-ресторанлар жойлаштирилади.

Савдо-логистика маркази ишга туширилиши натижасида Ўзбекистон ҳамда Тожикистон тадбиркори томонидан ишлаб чиқарилган маҳсулотлари дўконларга жойлаштирилиб, шу ернинг ўзида савдо алоқалари йўлга қўйилади. Шу тариқа марказда хизмат кўрсатиш соҳасида минг нафар аҳоли бандлигини таъминлаш режалаштирилган.

—Туманимиз қўшни Тожикистон Республикасининг Сўғд вилояти билан чегарадош ҳудудда жойлашган бўлиб, кейинги йилларда тадбиркорлик, қишлоқ хўжалиги соҳасидаги ҳамкорлик кўлами кенгайиб бормоқда, — дейди “Андархон” МФЙ ҳоким ёрдамчиси Авазбек Абдураҳмонов. — Бу марказнинг ишга туширилиши эса икки томонлама улгуржи ва чакана савдони ривожлантиришга хизмат қилади.