Тадбирда Президент Шавкат Мирзиёевнинг байрам табригини Президент матбуот котиби Шерзод Асадов ўқиб эшиттирди.

Давлатимиз раҳбарининг қутловида мураккаб иқлим шароити, сув ва ер ресурсларининг тақчиллигига қарамасдан, аграр соҳада эришилаётган ютуқлар Ўзбекистон деҳқон ва фермерларининг меҳнацеварлиги ва фидойилигидан далолат экани таъкидланган.

Кенг кўламли ислоҳотлар, замонавий агротехнологияларнинг жорий этилиши ва давлат томонидан фаол қўллаб-қувватланиши туфайли катта натижаларга эришилаётгани, соҳа ходимларининг машаққатли меҳнати билан жорий йилда ғалла, пахта, пилладан мўл ҳосил олингани, озиқ-овқат маҳсулотлари етиштириш кўпайгани қайд этилган. Қишлоқ аҳолисини қўллаб-қувватлаш, жумладан, янги иш ўринларини яратиш, ер майдонларини тақсимлаш ва инфратузилмани ривожлантириш ишлари изчил давом эттирилишига алоҳида эътибор қаратилган.

"Атроф-муҳитни муҳофаза қилиш ва "яшил иқтисодиёт" йили" деб эълон қилинган 2025 йилда экологик тоза технологияларни жорий этиш ва аграр соҳани барқарор ривожлантириш муҳимлигига урғу берилган.
Президентимиз табригида деҳқон ва фермерларимиз, аграр соҳа жонкуярларига ҳалол меҳнати, азму шижоати учун миннатдорлик билдирилиб, эзгу тилаклар билдирилган.