Tadbirda Prezident Shavkat Mirziyoyevning bayram tabrigini Prezident matbuot kotibi Sherzod Asadov o‘qib eshittirdi.

Davlatimiz rahbarining qutlovida murakkab iqlim sharoiti, suv va yer resurslarining taqchilligiga qaramasdan, agrar sohada erishilayotgan yutuqlar O‘zbekiston dehqon va fermerlarining mehnatsevarligi va fidoyiligidan dalolat ekani ta’kidlangan.

Keng ko‘lamli islohotlar, zamonaviy agrotexnologiyalarning joriy etilishi va davlat tomonidan faol qo‘llab-quvvatlanishi tufayli katta natijalarga erishilayotgani, soha xodimlarining mashaqqatli mehnati bilan joriy yilda g‘alla, paxta, pilladan mo‘l hosil olingani, oziq-ovqat mahsulotlari yetishtirish ko‘paygani qayd etilgan. Qishloq aholisini qo‘llab-quvvatlash, jumladan, yangi ish o‘rinlarini yaratish, yer maydonlarini taqsimlash va infratuzilmani rivojlantirish ishlari izchil davom ettirilishiga alohida e’tibor qaratilgan.

"Atrof-muhitni muhofaza qilish va "yashil iqtisodiyot" yili" deb e’lon qilingan 2025 yilda ekologik toza texnologiyalarni joriy etish va agrar sohani barqaror rivojlantirish muhimligiga urg‘u berilgan.

Prezidentimiz tabrigida dehqon va fermerlarimiz, agrar soha jonkuyarlariga halol mehnati, azmu shijoati uchun minnatdorlik bildirilib, ezgu tilaklar bildirilgan.