Фото: «Халқ сўзи»

Навоий вилоятида Конституциямизнинг 31 йиллик тантаналари кенг миқёсда нишонланмоқда. Байрам арафасида бунёдкорлар томонидан ўнлаб ижтимоий соҳа объектлари ва маданий маиший иншоотлар фойдаланишга топширилди, саховатпеша ва мурувватли кишилар ҳомийлигида юзлаб оилаларга байрам совғалари туҳфа этилди.

Чунончи қурувчилар вилоятнинг бешта ҳудудида “Обод хонадон — обод кўча — обод маҳалла” лойиҳаси асосида маҳалла фуқаролари йиғинларининг янги бинолари рамзий калитларини топширишган бўлса, Навоий шаҳридаги 4- ва 21-умумтаълим мактаблари, Кармана туманидаги 7-давлат мактабгача таълим муассасаси мутлақо янги қиёфада эшикларини очди.

Байрамнинг асосий шодиёнаси Навоий шаҳридаги “Фарҳод” маданият саройида ўтказилиб, унда барча шаҳар ва туманлардан ташриф буюрган меҳнат илғорлари, маҳалла фаоллари ва илм аҳли ҳамда ёшлар иштирок этишди.

Вилоят ҳокими Н. Турсунов тантана иштирокчиларини мамлакатимиз Конституциясининг яна бир ёшга улғайганлиги билан қутлаб, жорий йилнинг 30 апрель куни умумхалқ референдуми орқали янги таҳрирда қабул қилинган Асосий Қонунимиз эришилаётган барча ютуқларнинг пойдевори бўлаётганлигига эътибор қаратди.

Анжуманнинг бадиий қисмида вилоят санъат усталари ва эстрада йўналишидаги ёш санъаткорлар ижросида байрам концерти намойиш этилди.

Темур ЭШБОЕВ, “Халқ сўзи”.