Парламент юқори палатаси аъзолари мунтазам равишда ёшлар билан учрашиб, уларнинг қизиқишлари, мақсадлари, Сенат фаолиятидаги янгиликлар юзасидан мулоқот ўтказиб келмоқда.

Хусусан, Сенатнинг Аграр, сув хўжалиги масалалари ва экология қўмитаси томонидан Тошкент давлат аграр университети талабалари билан учрашув ўтказилди.

Учрашувда Сенатнинг асосий фаолияти, хусусан парламент юқори палатасининг қонун ижодкорлиги, қонунлар ижроси бўйича парламент назоратини олиб боришнинг айрим жиҳатлари тўғрисида тушунтиришлар берилди.

Шунингдек, бугунги кунда долзарб қонунларни қабул қилиш, давлат дастурларининг ижросини таъминлаш, парламент назоратини олиб бориш, ижро органлари ва мансабдор шахсларнинг халқ олдидаги ҳисобдорлигини ошириш парламент фаолиятининг устувор йўналишлари эканлиги қайд этилди.

Суҳбат давомида Сенат ҳузуридаги Ёшлар парламенти аъзоларининг фаолияти, улар томонидан амалга оширилаётган ишлар хусусида ҳам тўхталиб ўтилди.

Сенатнинг маҳаллий Кенгашлар ва ёшлар билан ҳамкорлиги, қонунлар муҳокамасида ҳудудлар манфаати қанчалик муҳим аҳамият касб этиши билан боғлиқ шунингдек, парламент юқори палатаси фаолиятига тааллуқли кўплаб саволларига жавоб олди.

Талабалар Сенат қўмиталари ҳамда девони иш жараёни билан яқиндан танишиб, аграр, сув хўжалиги ва экология соҳаларида олиб борилаётган ислоҳотлар, соҳани тартибга солишнинг ҳуқуқий асослари юзасидан ҳам ахборотга эга бўлишди.