Президентимизнинг Олий Мажлис ва Ўзбекистон халқига йўллаган Мурожаатномасида белгиланган вазифалар ижроси доирасида Сурхондарё вилоятида экологик барқарорликни таъминлашга қаратилган кенг кўламли ишлар амалга оширилмоқда. Хусусан, вилоятда чанг-тўзонларнинг олдини олиш мақсадида 10 минг гектар майдонда «яшил макон» барпо этиш режаси изчил давом эттирилмоқда.

Маълумки, маҳаллий аҳоли орасида «афғон шамоли» деб аталувчи кучли чанг-тўзонли шамоллар ҳудуд экологияси ва аҳоли саломатлигига салбий таъсир кўрсатиб келади. Шу боис мазкур табиий омилнинг таъсирини камайтириш мақсадида вилоятда «яшил белбоғ», «яшил макон» ва бошқа экологик лойиҳалар ҳаётга татбиқ этилмоқда.

Шунингдек, Термиз туманининг Халқобод маҳалласида, М-39 автомобиль йўлига яқин ҳудудда жойлашган 8 гектар майдонда янги «яшил макон» боғи барпо этилмоқда. Ушбу ҳудуд нафақат экологик муҳофаза, балки аҳоли учун замонавий дам олиш маскани сифатида ҳам хизмат қилади.

Бугун мазкур майдонда ўтказилган ҳашарда кўнгилли аҳоли, ташкилот ва идоралар вакиллари, шунингдек, «маҳалла еттилиги» аъзолари томонидан 4 мингдан ортиқ маҳаллий тупроқ-иқлим шароитига мос, чангни яхши ушлаб қолувчи мевали ва манзарали кўчатлар экилди.

Мутахассислар таъкидлашича, бундай кўчатлар ернинг мелиоратив ҳолатини яхшилаш, ҳаводаги чанг миқдорини камайтириш ҳамда аҳолини табиий офатлар таъсиридан ҳимоя қилишда муҳим аҳамият касб этади. Бу эса Сурхондарё вилоятида экологик муҳитни яхшилаш ва инсон саломатлигини муҳофаза қилиш йўлидаги яна бир амалий қадамдир.

Фарҳод ЭСОНОВ, «Халқ сўзи».