Кўҳна тарих, қадим тамаддун, мозийдан сўйловчи сон-саноқсиз осори-атиқаларни бағрида яширган, мамлакатимизнинг жанубдаги гавҳари ҳисобланган Сурхон воҳаси чинданда сир-синоатларга бой. Миллий-маънавий, ўзбекона урф-одатлар, ўзлик ва миллат қиёфаси сақланган юрт бу!

Сурхондарё вилоятида Мустақиллигимизнинг шонли 33 йиллиги арафасида «Биз бир бўлсак – ягона халқмиз, бирлашсак – Ватанмиз!» эзгу ғояси асосида ўтказилган маънавият фестивали соф миллийлик ва табиат гўзалликларини ўзида уйғунлаштиргани билан халқ дилидан чуқур жой эгаллади.

Бугун мамлакатимизда Янги Ўзбекистонни барпо этишдек эзгу мақсад йўлида кенг қамровли ислоҳотлар олиб борилмоқда. Тараққиётнинг муҳим омили бўлган маънавият ва маърифатга жиддий эътибор қаратилаётир. Шу жиҳатдан барча соҳа ва жабҳаларда ривожланишни таъминлаш, жамиятда маънавий муҳитни яхшилаш, ёш авлодни билимга чорлаш, ҳар бир фуқарода юрт тақдирига дахлдорлик ҳиссини кучайтириш, қолаверса, қалблардаги шукроналик туйғусини намоён этиш масалалари ҳар доимгиданда долзарб.

Маънавият фестивали аҳолига кўтаринки кайфият улашиш билан бирга, улар қалбида шукроналик ҳиссини кучайтиришга хизмат қилди десак, муболаға бўлмайди. Тадбир доирасида «Инсон қадри», «Миллий бирдамлик», «Маърифатли оила» «Ватан мадҳи», «Миллий қадриятлар», Уч авлод учрашуви», «Кино карвон» каби 10 дан ортиқ лойиҳалар доирасида энг чекка ҳудудлар, маҳаллаларда аҳоли билан юзма-юз учрашувлар бўлиб ўтди.

Таниқли шоирлар, ёзувчилар, халқимиз ардоғидаги санъаткорлар иштирокида ўтган ҳар бир дастурда жонажон ватанимизнинг бой тарихи, аждодларимиз қолдирган маданий-маънавий мерос, халқимиз фаровонлиги учун амалга оширилаётган саъй-ҳаракатлар ҳақида сўз борди. Фестиваль доирасида «Инсон қадри» лойиҳасида кекса авлод вакиллари, ижтимоий кўмакка муҳтож инсонлар ҳолидан хабар олинди.

Республикамиз бўйлаб ўтказилаётган бу каби маънавият фестиваллари илм-маърифатни янада кенг тарғиб этиб, халқимизни маънан бирлаштираётгани билан аҳамиятлидир. Фестиваль шукуҳи энг олис маҳаллалар, қишлоқ овулларига ҳам кириб борди. Биргина мисол, Сурхондарё вилоятининг энг чекка ҳудудларидан бири — Сариосиё туманидаги Кундаи жувоз қишлоғи вилоят марказидан 250 километр, туман марказидан 150 километр узоқликда жойлашган. Бу қишлоққа Тўпаланг сув омбори орқали борилади. Маънавият фестивали айнан мазкур қишлоқ ва шу каби чекка ҳудудлардаги аҳоли даврасида ўтказилди. Қишлоқ одамлари билан самимий суҳбатлар, шукуҳли маданий тадбирлар бўлиб ўтди.

Бундай учрашувлар юртдошларимиз, аввало, ёшлар қалбида амалга оширилаётган ислоҳотларга дахлдорлик, ўзаро меҳр-оқибат, ҳамжиҳатлик, ватанпарварлик, шукроналик, туйғуларини кучайтириш, маҳаллаларда аҳоли кайфиятини кўтариш, уларнинг ижтимоий фаоллигини оширишга хизмат қилаётгани билан аҳамиятлидир.

Наргиза РАҲМАТУЛЛАЕВА,

Республика Маънавият ва маърифат маркази

Сурхондарё вилояти бўлими раҳбари.