Ўзбекистонда ногиронлиги бўлган болалар учун ижтимоий хизматларни такомиллаштириш ва уларни қўллаб-қувватлаш мақсадида Шавкат Мирзиёевнинг «Ногиронлиги бўлган болаларга ижтимоий хизмат ва ёрдам кўрсатиш тизимини янада такомиллаштириш бўйича қўшимча чора-тадбирлар тўғрисида»ги қарори қабул қилинди.

Қарорга мувофиқ, 2025 йил 1 мартдан тажриба-синов тариқасида Қорақалпоғистон Республикаси, Андижон, Қашқадарё, Самарқанд, Сурхондарё ва Тошкент вилоятлари ҳамда Тошкент шаҳрида ногиронлиги бўлган болалар учун кундузги парвариш хизмати йўлга қўйилади. Шунингдек, 2025 йил 1 октябргача ушбу хизмат республиканинг барча ҳудудларида фаолият бошлайди.

Ушбу парвариш хизмати давлат-хусусий шериклик асосида ташкил этилади. Ногиронлиги бўлган болалар ушбу хизматга ота-оналарининг «Инсон» ижтимоий хизматлар марказлари билан тузилган ижтимоий шартнома асосида ва Психологик-тиббий-педагогик комиссия томонидан берилган хулосага мувофиқ қабул қилинади. Бу хизмат болаларнинг ижтимоий мослашувини осонлаштириш ва ота-оналарга кўмаклашишни мақсад қилади.

2025 йил 1 мартдан бошлаб, кундузги парвариш хизмати билан шуғулланувчи тадбиркорларга бир қатор қўллаб-қувватлаш чоралари жорий этилади. Жумладан, кундузги парвариш хизматидан фойдаланган ҳар бир бола учун давлат томонидан субсидия ажратилади. 3 ёшдан 7 ёшгача бўлган болалар учун базавий ҳисоблаш миқдорининг 25 фоизи, 7 ёшдан 18 ёшгача бўлган болалар учун эса 27 фоиз миқдорда молиявий ёрдам ажратилади.

Бундан ташқари, вилоятлар марказлари, Тошкент ва Нукус шаҳарларида ушбу субсидия миқдорини 1,1 коэффициентга кўпайтириш режалаштирилган. Шу билан бирга, камбағал оилалар рўйхатига киритилган оилалар учун ногиронлиги бўлган болаларга субсидия миқдорининг 30 фоизи қўшимча равишда қоплаб берилади.

Тадбиркорларни янада қўллаб-қувватлаш мақсадида 2027 йил 1 июлгача кундузги парвариш хизматини йўлга қўйган тадбиркорларга имтиёзли кредитлар ажратилади. Бу маблағлар мебель ва жиҳозлар хариди учун давлат-хусусий шериклик лойиҳаси доирасида Марказий банкнинг асосий ставкасида тақдим этилади.

Қарорга мувофиқ, ижтимоий хизматларни рақамлаштириш учун янги электрон тизимлар яратилади. 2025 йил 1 мартга қадар «Ягона миллий ижтимоий ҳимоя» ахборот тизимида «Кундузги парвариш хизматини бошқариш» ахборот модули ва унинг мобиль иловаси ишлаб чиқилади. 2025 йил 1 сентябргача эса болаларнинг саломатлиги ва ривожланишига оид диагностика тизимини такомиллаштириш мақсадида «Болалар саломатлиги» ахборот тизими ишга туширилади.

Давлат-хусусий шериклик асосида ташкил этиладиган мазкур хизматларга оид қўшимча имтиёзлар белгиланади. Жумладан, Солиқ кодексига ўзгартириш киритилиши режалаштирилган бўлиб, унга кўра, кундузги парвариш хизматини кўрсатувчи тадбиркорлик субъектлари 2030 йил 1 январга қадар барча турдаги солиқларни (ижтимоий солиқдан ташқари) тўлашдан озод қилинади.

Бундан ташқари, ота-оналарнинг кундузги парвариш хизматидан фойдалангани учун ойига 3 миллион сўмгача бўлган тўловлари солиқ солинмайдиган даромадлар тоифасига киритилиши таклиф этилмоқда.

Ногиронлиги бўлган болалар учун кундузги парвариш хизматини жорий этиш уларнинг ижтимоий интеграциясини таъминлаш, таълим ва тиббий кўмакдан фойдаланиш имкониятини оширишга хизмат қилади.

Шу билан бирга, бу ота-оналар учун ҳам катта ёрдам бўлиб, уларнинг меҳнат бозоридаги иштирокига ижобий таъсир кўрсатади. Давлат томонидан тадбиркорларга берилаётган имтиёзлар эса ушбу хизмат турини кенг қамровли ва самарали ташкил этишга ёрдам беради.