2024 йилги ФИДE Жаҳон чемпионати доирасида ўтказилган илк ўйинда Динг Лирен ҳиндистонлик ёш ва истеъдодли шахматчи Гукешга қарши қора доналарда ғалаба қозонди. Ўйинда Гукеш тажовузкор услубда ҳаракат қилган бўлсада, Динг унинг ҳужумига қарши самарали ҳисобланувчи контрҳужумни амалга оширди. Бу ғалаба Динг учун жорий йилдаги классик шахматдаги биринчи ютуқ бўлди.

Илк рамзий юришни амалга ошириш учун махсус меҳмон, «Google DeepMind» асосчиси ва Нобел мукофоти совриндори Демис Хассабис таклиф қилинди. Динг ўйин давомида ҳар бир ҳаракатда кўп вақт сарфлаган бўлсада, ўйинни ютиш учун муҳим стратегияларни тўғри танлади. Гукешнинг 30-юришдаги хато ҳаракати рақибига ўйинни тугатиш учун имконият яратди. Шунга қарамасдан, Гукешнинг ҳужум стратегияси шахматчилар ва экспертлар томонидан юқори баҳоланди.

Бу ўйин 2010 йилдан бери жаҳон чемпионатидаги илк очилиш партиясида ғалаба қайд этилган ҳолат бўлди. Динг ўйиндан кейинги матбуот анжуманида ўзининг омади чопганини таъкидлаган бўлса, Гукеш асабийлашгани туфайли айрим хатоларга йўл қўйганини тан олди. Ҳар икки ўйинчи кейинги партияларда ўз ҳаракатларини яхшилашга интилишини билдирди.

Гукеш Доммаражу ўз ўйини ҳақида шундай деди: «Мен жуда асабий эдим, лекин ўйин бошлангандан сўнг тинчландим. Мен Дингни дебютда ажаблантирдим, яхши шахмат ўйнадим, аммо кейин хатолар қила бошладим. Мен ўйинда рақибимнинг энг яхши версиясини кўришни кутгандим. Мен тактик хатога йўл қўйдим, бу эса содир бўлиб туради. Олдинда яна кўп ўйинлар бор ва энди матч янада қизиқарли бўлади».

«Мен бу матчдаги биринчи ўйин биринчи ўйин бўлгани учун Гукеш қаттиқ ҳаяжонланади деб ўйладим, шунинг учун узоқ вақтдан бери ўйнамаган бирор ноодатий нарсани синаб кўришга қарор қилдим ва бу мукаммал ишлади! Матчда етакчилик қилиш мен учун бутунлай янги тажриба. Эртага менда оқ фигуралар бўлади ва ҳали тайёргарлик кўрмаганим учун, кейинги ўйинда қандай ёндашувни танлашимни билмайман», деган Хитой вакили.

Чемпионатда ҳар икки ўйинчи 14 та ўйинда иштирок этиши керак. Ғолиб сифатида энг биринчи 7,5 очко йиғган шахматчи эълон қилинади. Агар натижа тенг бўлса, тайбрейк ўйинлари ўтказилади. Навбатдаги ўйин бугун Тошкент вақти билан 14:00да бошланади.