Ўзбекистон Республикаси Олий Мажлиси Сенатида Ўзбекистон Республикаси Олий Мажлиси ва Вьетнам Социалистик Республикаси Миллий мажлиси ўртасидаги парламентлараро ҳамкорлик бўйича гуруҳларнинг онлайн учрашуви бўлиб ўтди.

Учрашувда икки мамлакат ўртасидаги дўстона алоқаларни янада мустаҳкамлаш, ўзаро ҳамкорликнинг янги йўналишларини белгилаш ҳамда парламентлараро мулоқотни ривожлантириш масалалари муҳокама қилинди.

Таъкидланганидек, Ўзбекистон ва Вьетнам ўртасидаги муносабатлар қадимий тарихий илдизларга эга. Бугунги кунда икки давлат раҳбарларининг сиёсий иродаси туфайли барча соҳаларда ҳамкорлик тобора изчил ривожланиб бормоқда. Сўнгги йилларда ўтказилган олий даражадаги учрашув ва ташрифлар ўзаро ишончни мустаҳкамлаб, ҳамкорликни янги босқичга олиб чиққани қайд этилди.

Шу билан бирга, маданий-гуманитар соҳада ўзаро ҳамкорлик юзасидан ҳам фикр алмашилди. Хусусан, Тошкент давлат шарқшунослик университетида Вьетнам тили ва маданияти маркази фаолият юритиши, шунингдек, икки давлат ўртасида тўғридан-тўғри авиақатновлар йўлга қўйилгани, бу эса халқлар ўртасида яқин муносабатларни мустаҳкамлаётгани таъкидланди.

Учрашув якунида ҳамкорлик бўйича парламентлараро гуруҳлар фаолиятини тизимли йўлга қўйишга, уларнинг ҳар йили камида бир марта қўшма йиғилишини ўтказишга ҳамда навбатдаги қўшма йиғилишини Ўзбекистон Республикасида ташкил этишга келишиб олинди.