Oʻzbekiston Respublikasi Oliy Majlisi Senatida Oʻzbekiston Respublikasi Oliy Majlisi va Vyetnam Sotsialistik Respublikasi Milliy majlisi oʻrtasidagi parlamentlararo hamkorlik boʻyicha guruhlarning onlayn uchrashuvi boʻlib oʻtdi.

Uchrashuvda ikki mamlakat oʻrtasidagi doʻstona aloqalarni yanada mustahkamlash, oʻzaro hamkorlikning yangi yoʻnalishlarini belgilash hamda parlamentlararo muloqotni rivojlantirish masalalari muhokama qilindi.

Taʼkidlanganidek, Oʻzbekiston va Vyetnam oʻrtasidagi munosabatlar qadimiy tarixiy ildizlarga ega. Bugungi kunda ikki davlat rahbarlarining siyosiy irodasi tufayli barcha sohalarda hamkorlik tobora izchil rivojlanib bormoqda. Soʻnggi yillarda oʻtkazilgan oliy darajadagi uchrashuv va tashriflar oʻzaro ishonchni mustahkamlab, hamkorlikni yangi bosqichga olib chiqqani qayd etildi.

Shu bilan birga, madaniy-gumanitar sohada oʻzaro hamkorlik yuzasidan ham fikr almashildi. Xususan, Toshkent davlat sharqshunoslik universitetida Vyetnam tili va madaniyati markazi faoliyat yuritishi, shuningdek, ikki davlat oʻrtasida toʻgʻridan-toʻgʻri aviaqatnovlar yoʻlga qoʻyilgani, bu esa xalqlar oʻrtasida yaqin munosabatlarni mustahkamlayotgani taʼkidlandi.

Uchrashuv yakunida hamkorlik boʻyicha parlamentlararo guruhlar faoliyatini tizimli yoʻlga qoʻyishga, ularning har yili kamida bir marta qoʻshma yigʻilishini oʻtkazishga hamda navbatdagi qoʻshma yigʻilishini Oʻzbekiston Respublikasida tashkil etishga kelishib olindi.