Сардоба туманидаги «Дўстлик» маҳалла фуқаролари йиғини ҳудудида маҳалла сервис компанияси ташкил этилди.

Мазкур компания томонидан электр уста хизмати, сантехника ишлари, ерга ишлов бериш, дарахтларга шакл ва кимёвий ишлов бериш, оқова хандақларини қуриш ва тозалаш, қудуқ қазиш каби жами 23 турдаги хизматлар кўрсатилмоқда. Шунингдек, сервис компанияси маҳалла ҳудудидаги 2,5 километр ариқлар, пиёдалар йўлаклари ва 9 та кўчанинг тозалигини таъминлаб келмоқда. Шу билан бирга, чиқиндиларни тўплаш ва саралаш учун махсус шохобча ҳам барпо этилди.

— Ҳозирги пайтда вилоятимиз туман ва шаҳарларида биттадан маҳаллада сервис компаниялари фаолият кўрсатмоқда, — дейди Ўзбекистон маҳаллалари уюшмаси Сирдарё вилояти бошқармаси бошлиғи Уйғун Хатамов. — Айтиш жоизки, намуна тариқасида ташкил этилган ушбу хизмат кўрсатиш мажмуалари кутилганидан ҳам юқори натижа берди. Эндиликда маҳалла аҳолиси, айниқса чекка ҳудудда яшовчилар турли хизматлар учун шаҳарга ёки туман марказига бормасдан, вақт ва харажатни тежаган ҳолда хизматлардан фойдаланяпти. Яқин вақтларда сервис хизматлари янада кўпайтирилиб, 25 тага етказилади. Шунингдек, вилоятимизнинг 221 та маҳалласида ҳам шундай сервис компаниялари ташкил этилиши кўзда тутилган.

Аҳмадали ШЕРНАЗАРОВ, «Халқ сўзи».