Россияда ноқонуний яшаб келаётган мигрантлар 2025 йилнинг 30 апрелига қадар мамлакатни тарк этиши ёки ҳуқуқий мақомларини тартибга солиши шарт. Президент Владимир Путин томонидан имзоланган «Ноқонуний мигрантларнинг Россияда бўлишини тартибга солиш бўйича вақтинчалик чора-тадбирлар тўғрисида»ги фармонда мазкур талаблар акс этган. Фармонга кўра, талабларга амал қилмаган мигрантлар депортация қилиниши мумкин.

Мигрантларнинг ҳуқуқий мақомини расмийлаштириш учун қатор талаблар белгиланган. Улар шахсий биометрик маълумотларни топшириш, наркотик моддалар истеъмол қилмагани ва юқумли касалликларга чалинмагани ҳақида тиббий кўрикдан ўтиш, рус тили, Россия тарихи ва қонунчилиги бўйича имтиҳон топширишни ўз ичига олади. Шунингдек, мигрантлар ўтган мажбурий тўловлар бўйича қарзларини тўлашлари шарт.

Қайд этилишича, Россияда ноқонуний мигрантлар сони 739 минг нафарга етиб, уларнинг асосий қисмини Ўзбекистон, Қирғизистон, Арманистон ва Озарбайжон фуқаролари ташкил қилади. Умумий мигрантлар орасида ноқонунийлар улуши 9 фоизни ташкил этади ва бу кўрсаткич сўнгги тўрт-беш йил ичида 30 фоизга ошган.

Президент фармонига кўра, Россия армиясида хизмат қилиш учун шартнома тузган муҳожирлар депортация қилинмайди. Бундан ташқари, уларга нисбатан илгари қабул қилинган депортация ёки Россияга киришни тақиқлаш қарорлари бекор қилинади. Бу муҳожирлар Россия ҳудудида туриш ҳуқуқига эга бўлади.